India-ah Apple Store an hawng ve ta
April ni 18 khan Apple chuan Mumbai-ah India-a an official retail store hmasa ber an hawng ve ta a, vawiin, April ni 20 hian India- an dawr pahnihna chu Saket, New Delhi-a Select City Walk Mall-ah an hawng leh dawn bawk a ni.
Apple hian a hma chuan Indian customer te tan Authorised Apple store an nei a, mahse, heng Authorised Apple store te nen hi chuan an official Apple Store hi chu a inthlau hle niin an sawi. Apple BKC an tih mai, India-a Apple official retail store hmasa ber hi Jio World Drive Mall, Bandra Kurla Complex (BKC), Mumbai-ah hawn a ni a, Apple-in India-a an hralh chhuah ang zawng zawng chu bakah accessory zawng zawng te a awm vek a, dawr thar lawm nan hian customer ten an Apple bungraw lei te an hriatchian lehzual theih nan ‘Today at Apple’ free sessions an kalpui dawn bawk a ni.
Apple dawr thar hawnnaah hian Apple ngainatute an pungkhawm nasa hle a, Apple CEO Tim Cook pawh dawr thar hawnnaah hian telin, ani hian Prime Minister Narendra Modi pawh Apple-in huang zauh an tum zel dan te sawipui turin a hmu dawn niin report a awm bawk.
Apple Store hi a special hle a, company lam chuan Apple BKC hi khawvel hmun hrang hrang Apple Store dang ai pawha energy-efficient a nih thu an puang a, ama pual solar array neiin, fossil fuel pakhat mah an hmang lo niin an sawi a, carbon neutral niin, 100 percent renewable energy a hmang niin an sawi bawk.
Apple Store tharah hian iPhone chi hrang hrang, a model thar ber thlengin, Mac, iPad, AirPods, Apple Watch leh Apple TV chi hrang hrang an chhawp chhuak nghal a, accessories chikim a awm nghal bawk. Hei vakah hian Apple Pickup facility neiin, customer ten online-a Apple product an lei chu he dawr atang hian an la thei dawn a ni.
Apple hian India-ah kum 25 hmel a hmu ve ta chiah a, 2017 atang khan iPhone pawh India-ah an siam ve tan a, India atanga an thawn chhuah zawng zawng pawh 2022-2023 financial year-ah dollar tluklehdingawn 5 (cheng vaibelchhe 400 vel) a tling a ni.
India-ah Apple Store an hawng ve ta
