C. Lalramsanga, s/o C. Lungmuanpuia, Durtlang, Mission Veng Badminton Club player chu Netherland leh Germany a neih tur, Dutch Junior International 2025 leh German Junior 2025-ah India aiawh a Mixed Doubles category khel turin a in vaw tling.
Heng badminton tournament lian pahnih khel tur thlanna hi Delhi-ah January ni 18-21, 2025 chhung khan neih a ni a. India rama player tha, ranking thar bera palina chin bakah kumin kumtir a Junior Ranking Badminton Tournament, Hyderabad-a neih tuma semi final lut chin te selection trial hmachhawn tura koh an ni. Ramsanga hi Mixed Doubles category-ah Vishakha Toppo nen an inlan a, Boy’s Doubles category-ah Bjorn Jaison nen inlan tura koh an ni bawk.
Mixed doubles category bikah hian an tumpui te an hneh vek a, point 6 hmu in a chung berah an awm, India ram ai an awh dawn. Boy’s doubles category-ah erawh vawi hnih hnehna an chan hnu in, an match hnuhnung ber ah 19-21, 21-10, 18-21 in, uiawm takin an chak lo a, an tumpui Mithilesh P.K leh Vishnu Kedhar Kode-te hian India ai an awh ve thung dawn a ni.
Tin, he selection trial hi Lalrempuii, d/o Albert Lalrosanga, Serchhip, Ralte Villa Badminton Club tana khel mek leh Tanoo Chandra-te chuan Girl’s Doubles category-ah an hmachhawn bawk a, an match hnuhnung berah 21-14, 13-21, 20-22 in an vanduai a, tun tumah chuan India tan an inlan phak dawn ta lo.
Ramsanga hi Junior category bikah Mizoram badminton player, India tana inlan thei hmasa ber a ni a, Sub-Junior category ah kum 2023 khan H. Lalthazuala, Chanmari West chu a lo inlan tawh bawk.
Dutch Junior International 2025 hi February ni 26 atanga March ni 2, 2025 inkar chhunga khelh a ni dawn a, Yonex German Junior 2025 hi March ni 5-9, 2025 inkar chhunga khelh a ni thung dawn a ni. International level tournament lian khel tura in vaw tling, Ramsanga hi Mizoram Badminton Association chuan a chhuang takzet a. A tournament khelh tur pawh tha taka khel thei turin leh, hriselna tha nei turin duhsakna sang ber a hlan a ni.
India aiawh tur Lalramsanga
