Indian National Developmental, Inclusive Alliance (INDIA) te chuan inhmuhkhawm tum thumna Mumbai-a an neih turah Janata Dal (United) leader leh Bihar Chief Minister Nitish Kumar chuan Opposition inlungrual avangin BJP leader te an talbuai mek tia sawiin hei bakah hian Kumar chuan Mumbai meeting chu party dangte pawhin an zawm dawn tiin a sawi bawk.
Kar kalta khan Rashtriya Janata Dal leader leh Bihar Chief Minister hlui Lalu Prasad pawhin Prime Minister Narendra Modi chuan Bhim Rao Ambedkar constitution chu nuai reh vek a tum tia sawiin INDIA chuan democracy a humhim dawn tiin a sawi bawk a.
“BJP te hian fiah tak maiin a hma zawng chuan Opposition party te chu an darh tih an hria a, tunah chuan opposition party te ka hmalakna avangin an inthuikhawm tawh a ni. Opposition-te inlungrual avangin an chak lo dawn tih an hriat avangin an hlauthawng tawh a ni. Hei vang hian a nia BJP leader tena min beih vak vakna chhan ni. Kei erawh chuan ka chungchang an sawiah buaina ka nei lo va, ka thawk mawp mawp ang,” tiin Kumar chuan a sawi.
INDIA meeting tum hnih lai Patna leh Bengaluru-ah neih a ni tawh a, a tum thumna chu Mumbai ah August 31 leh September 1 hian neih a ni dawn bawka kal zel dan tur an ruahman dawn a. Opposition tanrualnaah hian Kumar chuan pawimawhna thuk tak neiin hei vang hian INDIA convener-ah ruat ni dawna sawi a ni bawk.
Kumar chuan opposition inlungruala siam bak chu engmah amah mimalin nih tum emaw a nei lo tiin a sawi bawk a. Mumbai meeting-ah political party dang te pawhin an zawm tur thu sawiin Lok Sabha seat insem dan tur pawh an ngaihtuah ho ang tiin a sawi bawk a.
“Meeting tum thumna nei turin Mumbai ka pan ang a, issue hrang hrang sawihona neih a ni ang a. Meeting-ah political party min zawm thar tur te an awm bawk a. Issue thenkhatah thutawp kan siam ang a, seat insem dan tur te pawh kan sawiho ang,” tiin Kumar chuan a sawi.
Lalu Prasad pawhin Mumbai meeting hmain engkim peihfel a ni tawh tia sawi bawkin Mumbai meeting chu Lok Sabha inthlan hmaa inhmuhkhawm hnuhnung ber tur a ni tawh ang tiin a sawi bawk.
Chutih lai chuan Bihar Deputy Chief Minister Tejashwi Prasad chuan Prime Minister Narendra Modi chu sawiselin India public undertaking pawimawhte leh resource pawimawhte chu private company hnena hralhah a puh a.
“India sorkar company, resource leh national wealth te BJP tena industrialist lian te hnena reform tih changchawia an hralh hi mirethei, loneitute kalha chetlakna a ni a. Eng vangin nge central BJP sorkar hian national assets pawimawh em em trillion tel hu private company te hnenah a hralh? Modi sorkar hian ram hausakna a tipung thei lo a nih chuan eng vang nge kum tam tak chhung independence hnua rim taka thawha ramin a neih te man tlawm taka a hralh,” tiin Yadav chuan a sawi a.
Hei bakah hian Modi sorkar chuan national assets pawimawh te Modi sorkarin capitalist thlan bik te hnena a hralh chuan ram leh economy a tihchangtlun dan tur sawifiah rawh se tiin a sawi bawk a.
“Keini India mipuite chuan ram rohlu pawimawh tak tak te capitalist tlemte te hnena hralh zel tumna hi a tawp thlengin kan do dawn,” tiin Yadav chuan a sawi bawk.
RJD’s chief spokesperson leh Rajya Sabha member Dr. Manoj Kumar Jha pawhin caste-based survey neiha mawhphurtu chu Prime Minister’s Office (PMO) a ni tiin a sawi bawk a. Bihar aiawh pali tena caste survey chungchang Prime Minister an hmuhnaah pawh Narendra Modi chu a ngawi reng tiin a sawi a. PMO chuan RSS ngaihtuahna a kalsan thei tak tak lo a ti bawk.
INDIA alliance te hian an tum ber chu BJP sorkar paihthlak niin chumi tura Opposition party hrang hrangte chu an inhlawmkhawm a ni.
INDIA Alliance-in ruahmanna siam fel tawh
