Daily Newspaper

India, China ten inbiaknaah inremna siam lo

100

India leh China tena ’13th round of senior military commander talks’ an neih chu awmze nei lova tawpin ram pahnih te an inpuhtawn ve ve a. Army te chuan Indian aiawhte chuan ‘rawtna mumal tha’ an thlen tia an sawi laiin Chinese military te chuan thuchhuah an siamah India chu ‘awm ang lo leh tihhlawhtlin theih loh ngiat’ an ti ve thung.

“Meeting neihnaah India lam chuan rawtna mumal zawkin buaina la chinfel loh te chinfel nan hmalakna tur a sawi chu China lam chuan an pawm thei lova, rawtna pawh an siam thei chuang lo. Chuvang chuan resolution engmah siam lova tihtawp a ni,” tiin Army chuan thuchhuah siamin an tarlang.

India leh China te chuan Pathianni khan 13th round of senior military commander talks an nei a, sawiho bera an neih chu Hot Springs a Patrolling Point 15 niin hei bakah hian Line of Actual Control (LAC) a inbakaihna a awm loh nana inhnuhdawh te pawh a tel a. ZIng lam dar 10.30 a inbiakna neih tan chu zan lam dar 7 ah an tawp chauh niin defence official-te chuan an sawi.

“India lam chuan LAC buaina te chu CHinese lam tena status quo bawhchhia leh ram pahnihte inremna bawhchhiatna an neih vanga thleng a ni a. Hei vang hian Chinese lam ten Western Sector LAC a remna leh muanna a awm theih nan hma an la tur a ni tiin an sawi,” tiin Army te chuan an sawi bawk.

Ram pahnih foreign minister te chuan tun hnaia Dushanbe a inbiakna an neihah ram pahnih te chuan harsatna la awm te chinfel a nih theih nan chak taka hmalak tur an ti a, chu chu bawhzui zel niin tuna thu inchuh chinfel ni thei se chuan ram pahnih inlaichinna a tha zual tur an ti bawk.

Ram pahnihte chuan inremna siam thei lo mahse inbiak pawh tawn reng leh ramri khawih chet lova awm tir an remti tiin Army te chuan an sawi bawk a. “Chinese lam ten ram pahnih inlaichinna ngaihtuah chungin tuna buaina la chinfel loh te pawh chinfel a nih theih nan hma an lak kan beisei,” tiin Army thuchhuah chuan a tarlang bawk.

Chinese military tena thuchhuah an siam hi Beijing a China Defence Ministry atanga chhuak a ni lo va, a hma zawng chuan Defence Ministry atanga chhuak a ni thin a, tun Pathianni zana thuchhuah erawh PLA Western Theatre Command, Chngdu atanga tihchhuah a ni thung a. Hei hian Beijing chuan LAC buai chinfel chungchangah Beijing chuan ngaih pawimawhna a nei tlem hle tawh tih a tilang tiin analyts te chuan an sawi.

Ram pahnihte chuan ramri a inbakkaihna a thlen tawh loh nan patrolling protocol thar kalpui ni se an ti bawk a. Nikum May thlaa intihbuaina thlen hnuah ram pahnih te chuan political, diplomatic leh military level-ah inbiakna an nei zut tawh a. February thla khan Pangong Tso atanga inlakchhuah leh August thla khan Gogra a Patrolling Point 17 atanga inlakchhuah chu an lo remti dun tawh a. Tuna thu inchuh la ni mek chu Hot Springs, Demchok leh Depsang te a ni a. Officials te chuan Hot Springs hi chu chinfel mai theih turah ngaiin Demchbok leh Depsang erawh legacy issue thil a nih avangin chinfel harsa turah an ngai thung.

PLA thuchhuah pawhin inremna emaw inhnuhdawhna emaw protocol thar emaw sawi lanna a nei lo va. PLA Senior Colonel Long Shaohua, Westhern Theatre Command thupuangtu chuan, “China chuan ramri buaina chinfel a nih theih nan theihtawp a chhuah a, ram pahnih tena inlaichinna tha an neih theih nan theihtawpin hma a la a ni,” tiin a sawi.

Inbiakna neih fo a nih vangin hmun thenkhatah chuan inhnuhdawh a ni chungin PLA sipai sang tel te chu forward areas-ah te an la awm reng a. External Affairs Minister S. Jaisahnkar leh Army Chief General Navarane te chuan inbiakna neiin inremna anga PLA tena an sipai tam tham tak an dah te an la hnukkir duh loh chhan chu an sawifiah an phut thu leh an inhnuhdawh hma chuan Chinese sipai te zah India sipai te chu la dah ve zel tur tiin an sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy