Reserve Bank Governor hlui Raghuram Rajan chuan private sector investment tlahniam nasa, interest rate sang bawk si leh global growth tlahniam mek nen India chuan ‘Hindu rate of growth’ a hnaih takzet tiin a sawi.
Rajan chuan thla kaltaa National Statistical Office (NSO) in quarterly growth a tihchhuaha national income estimate tarlan chu ngaihmawhawm takzet tiin a sawi bawk.
Hindu rate of growth tih hi kum 1950 chho leh kum 1980 chhova Indian economic growth hniam lutuk 4% vel lek sawi nana hman a ni a. Slow growth sawifiah nana Indian economist Raj Krishna-an a phuah a ni.
Third quarter (October-December) khan Gross Domestic Product (GDP) chu 4.4% niin July September kha chuan 6.3% a ni a, April-June khan 13.2% a ni thung. A kum hmasa financial year-a third quarter a growth rate chu 5.2% a ni thung.
“Optimists te chuan a hmaa GDP number-in san lam a pan chu behchhanah hmangin ngaihthat nan an hmang ang a, kei erawhin he thilin growth a tihmuan theih danah ngaihthatlohna ka nei a ni. Private sector tena investment an siam duh loh zel laiin RBI-in interest rate a tisang zel a, kumin hian global growth a muang zel dawn bawk si a, khawi atangin nge growth tihsanna tur kan neih ang ka chiang ngam ve lo” tiin Rajan chuan a sawi.
Tun hnaiah Chief Economic Advisor V Anantha Nageswaran chuan quarterly growth tlakhniam nachhan chu tun hnai kuma national income estimate revision tihsan vang tiin a sawi thung a.
Zawhna pawimawh ber chu Indian growth chu fiscal 2023-24 ah hian eng dinhmunah nge a din ang tih a ni, tiin Rajan chuan a sawi a, “A hma kha chuan kan vanneih chuan 5% growth kan hmu thei kan ti a. A hnuhnung ber October-December Indian GDP number khan tlakhniamna nasa tak a pholang a ni,” tiin a sawi.
“Ka hlauhthawn a dikzia a lang a, RBI project phei chuan quarter hnuhnung berah khan growth 4.2% aia hniamah an dah a ni. Tun dinhmunah chuan October-December quarter hisap ang chuan pandemic len hma kum 3 kaltaa 3.7% nen khan thuhmun deuh reng a ni” tiin a sawi zui bawk a.
“Hei hi hlauhawm tak mai kan Hindu rate of growth hnaih tak mai a ni a. Hei ai hian kan titha thei a ni,” tiin a sawi a. Sorkar chuan infrastructure investment an tih belh nasat thu an sawi chungin manufacturing lamah hmasawnna a awm mang si lo a ni, tiin Rajan chuan a sawi bawk a.
Hmasawnna awm langsar chu services-ah a ni, a ti bawk a, chu chu central sorkar inrawlh tlemna a ni zui a ti bawk a. Production-linked incentive (PLI) scheme chungchangah Rajan chuan eng scheme pawh sorkarin sum a thehchuahna chuan hna a siam ngei dawn a, eng scheme pawh chhiah tihtlemna chuan final units India rama siamchhuahah bonus siamin chu chuan India ramah production leh export tam zawk a siam ang a ti bawk a.
“Evaluation pawimawh tak awmah hna engzah nge siam a ni a, hna pakhat siam nana hman engah nge ni. Sorkar stattistics ah chuan investment proposed 15 per cent atanga kal angin a sawi a, mahse, a tak takah chuan hna siamna tura sawi lawk atangin 3 per cent chauh siam a ni a. Chu chu hlawhtling tia sawi theih chi a la ni lo,” tiin Rajan chuan a sawi bawk.
Sorkarin a ruahman scheme tena sorkar beisei an phak a nih chuan kum rei lo te chhungin hna 0.6 crore siam hman thin tura ni a, chu chu India-in pangngai taka a kal nana a mamawh a ni, a ti bawk a.
“Tun hnaiah sorkar thupuangtu in cell phone export pung chu an scheme ruahman te hlawhtlinna tiin a sawi a. Cell phone thawnchhuah apiang kan subsidise a nih chuan a ni tur pawh a ni reng a. Mahse, zawhna pawimawh ber zawk chu cell phone thawnchhuah chuan India tan value added engzah nge a neih tih zawk a ni a, a nihna takah chuan a beitham hle a ni,” a ti.
Rajan chuan cell phone thawnchhuah pun laiin cell phone part chawkluh a pung a ti a, hei vang hian cell phone sector net export chu sorkarin scheme a kalpui hma nena inang deuh reng a ni, a ti bawk a.
“Subsidy atan sum tam tak kan seng ral a, Foxxconn te chuan parts siamna tur factory lian an din tur thu an sawi a, chu chu tun hma atang tawha an sawi a ni. PLI scheme te hi a hlawhtling tia kan sawi hmain finfiahna chiang tak tak kan neih hmasak a ngai,” a ti bawk.
Katherine Dusak Miller Distinguished Service Professor of FInance, UNiversity of Chicago Booth School of Business a thawk mek Rajan chuan developed economy lian ber ber te chu service economies-a innghat nasa an nih thu sawiin hei vang hian manufacturing sector lian lo mah se economy lian tak a nih theih tho a ti bawk a.
“Services tih hian unicorn tam ber te chauh a huam a ni lo, services chuan semi-skilled heng construction, transport, tourism, retail leh hospitality ah te pawh tam tak a thlen a ni” a ti a, “Hei vang han service job te hi nuihsawh lo ang u, India ramah manufacturing job a than chuan loh laiin services chuan agriculture atanga insawn te thlengin a lo kuangkuah vek zawk a ni,” a ti bawk a.
“Hna tautet siam turin manufacturing leh services tihhmasawn nan hma kan lak a ngai a, vanduaithlak takin, heng pahniha inputs tam ber te hian schooling, skilling an mamawh thung si a ni,” tiin Rajan chuan a sawi bawk.
Hindenburg tena Adani Group an puhna boruak awm mekah private family company te chungchanga sorkarin hma a lak theih dan chungchangah Rajan chuan, “Private company te thuk zawka enfiaha luhchilh lam niin ka hre lo,” tiin a sawi a. A pawimawh lai ber zawk chu sorkar leh sumdawng inkara langtlang lo thil tihtlem zawk a ni a, chumai bakah regulator tena an tihtur zalen taka an tih remtih a ngai a ti bawk a.
“Eng vangin nge tun thlengin SEBI tena Mauritius fund Adani stock trading la kalpui rengtu neitu te an la hriat theih loh Investigative agency te puihna an mamawh em ni?” tiin Rajan chuan zawhna a siam zui bawk.
India-in ‘Hindu rate of growth’ hnaih tial tial : Raghuram Rajan
