India-in Iran-Israel inkahhai puan lawmawm ti

India-in Iran-Israel inkahhai puan lawmawm ti
India chuan ni 12 an indo hnua Iran leh Israel ram hnihin inkahhai an puang chu lawmawm a tih thu sawi a, hetih rual hian Asia khawthlang lam rama himna leh inremna nghet zawk a awm ngei a duh tih a sawi bawk.
Iranian sorkar television chuan inkahhai kalpui tan a ni tih a sawi a. Israeli Prime Minister Benjamin Netanyahu-a pawhin US President Donald Trump-a’n Thawhlehni tuka inkahhai a awm tih a puan chu an pawm tih a sawi.
Iran hian Trump-a’n inkahhai kalpui tan tura a tih thlen hma lawkin thawh rukin missile hmangin Israel a la kap a. Israel pawhin a chhan let nan American hruaitu leh Netanyahu an inbiak hma lawkin Tehran bula radar a kap chhe bawk.
Indian foreign ministry chuan Thawhlehni khan thuchhuah siamin, “Heng lai ramah hian himna leh nghehna a awm theih ngei kan duh rualin Iran leh Israel inkara US leh Qatar ramten hma laa inkahhai a awm hi lawmawm kan ti hle a ni,” a ti.
India hian Iran-Israel inkar buainaa thil thlengte hi ngun takin a vil a, US-in Pathianni tuka Iran-a nuclear hmun a beih leh Iranian-ten a chhan let nana Qatar-a US sipai hmun a beihte pawh a ngaihven hle.
“Keini chuan heng lai vela buaina hrang hrang awmte ching fela sawiho tur hian inbiak leh palai intirh aia tha hi a awm lo tih hi kan ngaihdan a ni,” tiin external affairs ministry chuan a sawi.
“India chu chutiang tur atan chuan tih theih a neihah chet chhuah a inpeih reng a, a tute pawh muanna leh inremna nghet a awm theihna tura hma lam pan turin a duh a ni,” a ti.
Israeli sipaiten June 13-a Iran an kah atang khan Tehran leh Israel thian tha ni kawp, India hian inbiaa palai tira indawr turin ram hnihte hi a ti reng a. New Delhi hian Asia khawthlang lam hi tuialhthei leh boruakalhthei lakna kawng pawimawh a nih avang leh Indian maktaduai kaw chuang awmna a nih avangin boruak tang tak dinhmun chu a tir atangin a ngaihven hle a ni.
Thawhlehni thleng khan India hian Iran leh Israel atangin a mi 3,200 dawn a hruai haw tawh a. Iran-ah hian Indian 10,000 chuang leh Israel-ah 32,000 chuang an awm mek.
Inepna boruak tang tak karah hian India hi a tel vena, Shanghai Cooperation Organisation (SCO)-ten Israel-in Iran a bei an demnaah aw a thawh ve lo.
Iranian President Masoud Pezeshkian chuan Pathianni khan phone-in Prime Minister Narendra Modi chu a bia a, hetah hian Indian hruaitu hian buaina awm chu a ngaihven thu leh rema leh muanna a awm theih nan inbe turin a lo nawr a ni.