India siam ‘mini-cubes’ hrang hrang kengtel leh airlift mai theiha hmun kilkhawr ber berah pawha dah theih ‘khawvela portable disaster hospital’ hmasa ber chu khawvel hman theih tura chhawpchhuahin a awm dawn ta.
“He thil hman awlsam tak, mobile medical facility hian hmun harsa leh khirh takah pawh nunna a chhan thei dawn a. Survivor 100 vel zet hnenah critical medical care darkar 48 lai a pe thei dawn a, hmun kilkhawr leh remlo zet zeta medical thil mamawhnaah hman theihin a awm dawn a ni. He cubes hian silaimu, kang, lu lama hliam, spinal leh awm hliam te bakah, ruh tliak leh thisen chuak nasa te a enkawl thei dawn a. India chuan he hmanrua hi nei tha tawk tawhin khawvel hmun hrang hranga thawnchhuah thei turin a inpeih tawh a ni” tiin senior Health Ministry official chuan a sawi a.
Heng mai bakah hian tactical combat casualty care, massive haemorrhage leh hypothermia te pawh a enkawl thei dawn bawk.
He portable hospital hi Prime Minister Narendra Modi a ambitious ‘Project BHISHMA’ (Bharat Health Initiative for Sahyog Hita and Maitri) hmana siam niin operation theatre kimchang, mini-ICUs, ventilators, blood-testing equipment, X-ray machine leh cooking station thlengin a keng tel a. Heng mai bakah hain shelter facility leh power generator te pawh neiin chung te chu emergency laia chhawrnahawm tak a ni dawn a ni.
Life-saving equipment te chu ‘mini-cubes’ anga hlawm hranga siam niin heng mini-cubes hrang hrang te hi life-saving surgery te ang tih theih nana mobile hospital a hman theiha siam a ni a. Mini-cubes te chu “Aarogya Maitri Cube Cage” anga ken niin frame pathum a nei a, frame tinah mini-cubes 12 zel a awm a. Aarogya Maitri Cube Cage ah hian mini-cubes 36 lai a awm thei a ni.
‘Aarogya Matri’ mother cubes pahnih chuan ‘brick’ siamin chu chu water-and corrosion proof a ni bawk a. Hei bakah hian unique locking leh tamper-proof system keng telin awlsam tea lakchhuaha hman mai theiha siam a ni bawk a. A hmun tihthawl duhdan a zira paih mai theiha siam a ni bawk.
Health Ministry official te chuan he hmalakna hamgn hian India chuan developing ram te natural disaster leh humanitarian emergency tawng nasa te hnenah critical medical supply a pe thei dawn a ni a ti bawk a.
Heng siam tur hian sorkar chuan HLL Life Care te thlangin he project hi kum 2022 khan Ministry of Defence hmalaknaa kalpui tan a ni a. India chuan tribal area kilkhawrah dah mai bakah Sri Lanka leh Myanmar hnenah pek a tum tia sawi a ni bawk a. India chuan he a thil siam chhuah thar hi a mamawh tawk ang chu a nei tawka ngaih a ni.
India-in portable disaster-hospital siam
