India-in tuialhthei ni 60 daih leh LPG ton nuai riat la nei

India-in tuialhthei ni 60 daih leh LPG ton nuai riat la nei
Indian sorkar chuan Ninganni khan India chuan tunah hian ni 60 vel daih tuialhthei a nei tih a sawi a, hei bakah hian LPG ton 8,00,000 a nei bawk a, Asia khawthlangah buaina chhuak mah se ‘emergency a ngai lo’ tih a sawi.
February 28-a buaina a chhuah tan hnua a vawi khat nan petroleum & natural gas ministry chuan dah khawl zat dinhmun a tichhuak a, petrol pump leh LPG distributor-a lak tuma rei tak tak intlar a ngai nia sawi a awm laiin chiaia lei lo tura mi tih nan leh a hmangtute thlamuan a tum.
Dah khawl mek zat chipchiar taka sawiin ministry chuan India-ah hian dah khawlnaa dah zawng zawngah ni 74 vel daih a awm thei a, tunah hian ni 60 vel daih a awm mek tih a sawi a. Dah khawl a sawi hian thlitfim loh, thlitfim sa leh lei hnuaia la awmte a huam vek a ni.
“Tun dinhmunah ni 60 vel daih dah khawl a awm mek a ni,” a ti a. Ni 60 lo awm tura thlitfim loh phurh leh tur pawh Indian oil company-ten an tifel tawh niin a sawi bawk.
“India thlitfimna zawng zawng chu zaa zain an thawk vek a, chatlak a awm lo,” tiin ministry chuan thuchhuah siamin a tar lang.
Strait of Hormuz chhehvela buaina chhuakin lak luhna a nghawng nei tih chu a pha lo va, sorkarin hmun dang atanga a lak luhten hei hi a hliah khuh vek niin a sawi.
LPG chungchangah pawh ministry chuan ton 800,000 zet an nei tih a sawi a, hei hian thla khat tal a daih dawn a, ‘a dang lak luh tur’ pawh ‘tihfel thawkhat’ a nih thu a sawi.
LPG lak luhna kawng pawimawh, Strait of Hormuz kaltlanga bungraw phurh a buaithlak mek avanga hlauhthawnna a awm mek lai a ni.
Thuthang awmte hnawlin ministry chuan, “LPG tlakchham avanga PNG hmang tura innawr nia thil sawi chu a dik lo va, LPG kan neih hi a tam tawk,” a ti.
Sorkar hian petrol, diesel leh LPG a tlakchham loh thu sawi nawn lehin retail outlet zawng zawng chu a pangngaiin an thawk vek tih a sawi.
Ministry-in thuchhuah a siam hian sorkar hnuaia oil company – Hindustan Petroleum, Indian Oil Corporation leh Bharat Petroleum te chuan thuchhuah hrang hrang an tichhuak a, an ngah tawk thu an sawi a, tlakchham a awm nia sawi chu a dik lo tih an sawi.
Sorkar chuan, “Ram puma retail fuel outlet nuai khat chuang zet chu hawn vek a ni… pakhat mah rualkhaia sem tura tih a ni lo,” a ti.
“Ram chhung khawi hmunah pawh petrol, diesel, LPG tlakchhamna a awm lo,” tiin mamawh dinhmun chu ‘a him tawk a, thunun theih a ni’ a ti bawk.
Ministry chuan miin chiai takin an lei nasa nia sawi awm chu social media-a dik tawk lo thehdarh awm vanga puhin ‘hmun tlem te-ah chauh’ hetiang hi a awm thu an sawi a. Mipuite chu hetiang thu dik lo thehdarh lo turin an ngen bawk.
Thuchhuah chuan, “India-in a tlachham emaw, a ngah tawk lo emaw tia sawina eng pawh hnawl tur a ni,” a ti a. India dinhmun leh ram eng emaw zatin a rualkhaia an sem ang chu sorkar chuan ram chhungah a ngai ve rih lo tih a sawi bawk.