India-in UN General Assembly-ah Russia dem duh lovin hai zui zel

India chuan US General Assembly resolution-a Russia-in Ukraine a run demna kalpui lehah vote thlak duh lovin a hai leh ta.
He motion hi ram 141-in an thlawp a, ram 32 an hai a, ram pasarih Russia telin an thlawp lo thung a ni.
India chuan a dinhmun sawifiahna nei nawn lehin inbiakna hmanga buaina chinfel tum chu thil kalpui dan awm chhun tiin a sawi a. Delhi chu Russia-in a dinna nghet taka tichiang turin a nawr reng thung.
Ram hrang hrang, US leh Ukraine te pawhin Delhi chu ‘thil dik tia’ a dinna chiang taka sawi lang turin an nawr reng bawk a. Mahse India chuan chung nawrna te chu hnawlin a strategy ngai Russia tlang hraka sawisel chu a duh lo zui zel a. A hma pawhin UNGA leh UNSC ah te pawh hetiang deuha resolution kalpuiah te a lo hai tawh tho bawk.
India leh Russia te hian Cold War lai atang tawh khan kum tam tak inlaichinna an nei tawh a. Russia hi India hnena arms supplier lian ber ni bawkin tun hnaiah erawh Delhi-in ram chhunga defence manufacturing lam a kalpui nasat avangin ralthuam lei a tlahniam nasa thung.
Diplomatic lamah pawh ram pahnih te hian history thuk tak an nei a, Moscow hian a hma pawhin Kashmir chungchangah UNSC resolution siamah India thlawpin vote a lo thlak ve tawh bawk.
Mahse, Delhi chuan ‘UN charter, international law leh ram dangte sovereignty leh territorial integrity inzahsak’ chungchang erawh a hma pawhin Ukraine kaihhnawihah a lo sawi chhuak tawh thung a.
Zirtawpnia UN vote laknaah UN a India permanent representative Ruchira Kamboj chuan ‘mihring nun chanin eng solution mah siam theih a ni lo’ tiin a sawi.
New York-a UN motion hian Ukraine sovereignty leh territorial integrity thlawp leh remna leh muanna a awm theih nana hmalak zui nghal leh Russia-in Ukraine ram a awp a ram anga chhal te hnawlna a ni a.
Nikum September thla khan Moscow-a MP rual te chuan Ukraine a region pali chu an ram a nih tak thu chhalin vote an lo thlak tawh a ni.
UN chuan ‘Russian Federation chu Ukraine ramri internationally recognized border atangin a sipaite chhuanlam siam hauh lovin a la chhuak tur a ni’ tia sawiin tharum thawhna tihtawp nghal tur a lo ti tawh bawk.
Vote hai zingah hian India bakah China, Iran leh South Africa te pawh ram 32 zingah an tel a. Russia thlawpa vote thlaktu zingah Russia, Belarus, North Korea, Eritrea, Mali, Nicaragua leh Syria te an tel thung.