India-in US-Iran inkahhaiin Ukraine muan nana hmalaknaah rah tha a neih beisei

India-in US-Iran inkahhaiin Ukraine muan nana hmalaknaah rah tha a neih beisei
India chuan chawlhkar hnih chhung awh tur Iran leh US inkahhai chu lawmawm a tih thu a sawi rualin Asia khawthlanga thil thleng hian Ukraine-a remna zawnga hmalaknaah a tha zawnga nghawng a neih ngei a beisei thu a sawi bawk.
Strait of Hormuz-ah daltu awm lova khawvel sumdawnna kal a duh thu India hian a sawi bawk.
Iran leh US hian ni 40 chhung zet thlawhna hmanga an inbeihna leh energy leh hmunhma pawimawh dangte an inbeihsak hnuah leh indona zau zawkin Asia khawthlang a tuam hlauhna a thlen hnuah Nilaini zing atang khan China-in thlawp, Pakistan rawtna angin inkahhai an puang a. February 28-a Israel leh US tang dunin Iran an beih atanga intan buaina hian India-in tuialhthei a lak luh 50% phurhna kawng, Strait of Hormuz kaltlanga lawng veivah a tibuai hle a ni.
External affairs ministry thupuangtu, Randhir Jaiswal-a chuan Nilainia thuthar lakhawmtute a kawmnaah, “Inkahhai puan a ni hi kan lawm hle a, Asia khawthlangah remna nghet tak a thlen ngei kan beisei a. A hmaa kan lo sawi tawh angin, buaina kal mek hi a rang lama tihtawp a nih theih nan inbengdaih, inbiak leh palai hmanga indawr te a pawimawh hle a ni,” a ti.
“India hi engtik lai pawhin remna duhtu a ni a, remna leh muanna thlentu zawng zawngte lawmawm kan ti a, Asia khawthlanga he hmasawnna hian Ukraine-ah pawh remna zawnga hmalakna a tihchak ngei kan beisei,” a ti.
Buaina hian ‘mihringte hrehawm tawrhna nasa tak a thlen a, khawvel pum huapa energy phurhna leh sumdawnna a tibuai’ tih Jaiswal-a chuan a sawi a, India chuan Strait of Hormuz kaltlanga zalen taka lawnga kal leh khawvel puma sumdawnna kalphung pangngai a awm leh ngei a beisei tih a sawi.
Strait of Hormuz hi Iran-a Islamic Revolutionary Guard Corps (IRGC)-in a khar vek avangin energy phurh chhuahnaah nghawng a nei nasa hle a. Indona a chhuah atangin Indian lawng LPG phur pariat chauhvin an la paltlang a, Tehran hian a chhan azir zelin lawng hi a chhuah thin a ni.
Jaiswal-a chuan India hi Iran leh mi dangte nen an Indian lawng lianten strait an kaltlang theih nan inbe chhunzawm zel tih a sawi a, Tehran nen tuipui hman man pek chungchangah erawh an la indawr lo tih a sawi a. “Thil awm dan inher danglam reng a ni a, kan duh dan anga thil a awm theih nan kan thawhpui leh mi dangte nen kan inbe reng a ni,” a ti.
Donald Trump-a chuan social media-ah Pakistan Prime Minister Shehbaz Sharif-a leh army chief Field Marshal Asim Munir-a te nena an inbiakna hnuah Iran laka ‘chhiatna thlen tur thapui’ hman a tum chu chawlhkar hnih chhung atan tihkhawtlaia lehlam lehlama inkahhai a awm tih a tar lang a. Iran-in Strait of Hormuz ‘a hawn kim, a rang thei ang ber leh him taka hawn’ a remtihah a innghat tih a sawi bawk.
US chuan ‘sipai chakna hmanga a thil tum a hlen chhuak vek tawh’ tih a sawi a, Iran nena hun rei tak chhung remna siam tura inremna nghet tak siam turin ‘a hla hle’ tih a sawi.
Iranian Foreign Minister Seyed Abbas Araghchi-a chuan Supreme National Security Council atanga thuchhuah siamin Pakistan hruaitu, Sharif-a leh Munir-a te chu ‘indona tihtawp tuma an beih’ avangin lawmthu a hrilh a, an sipaite chuan ‘Iran laka beihpui thlakna tihtawp a nih chuan’ an inven hna an thawh an titawp dawn tih a sawi a. Hei hi US-in point 15-a rawtna a siam atanga inbiakna neih a dil vang leh Trump-a’n Tehran-in point 10 a rawtna a pawm vang niin a sawi.
India chuan Pakistan-in Iran leh US inkara palai hna a thawh dan chu a thlir a, a bikin Asia khawthlangah a tana pawimawh a awm a, tuialhthei leh boruakalhthei a lakna pawimawh tak a ni a, Indian maktaduai 10 vel chenna hmun a ni bawk.
Jaiswal-a chuan thuthar lakhawmtute hnenah hian Asia khawthlanga Indian-te himna chu ‘a ngaih pawimawh ber’ a la nih thu a sawi a. Israel, Iran, Iraq, Kuwait leh Bahrain chung boruak khar a nih avangin India mission-te chuan visa leh thenawm ram kaltlangin haw theih dan tur an siamsak tih a sawi.