India khua leh tui dik tak
Chakma enhrang dawn lo
Chief minister Lalduhoma chuan India khua leh tui dik tak Chakma-te chu India leh state sawrkarin a enhrang dawn lo tih a sawi.
Dampa bial by election atana Marpara North-a a campaign-naah ZPM Legislature Party leader Lalduhoma chuan, India leh state-in inlaichinna tha an duh a, India leh state chuan India khua leh tui dik tak Chakma an enhrang dawn lo tih a sawi.
Chakma Autonomous District Council-in an dil angin Mizo tawng zirtirtu an pe dawn tih a sawi a. “Mizorama awm kan nih angin Mizo tawng kan zir thiam ve a ngai,” a ti. CADC lamah MNF MDC lakah mipui an beidawng tawh a, tunah ZPM-in sawrkarna an siam mai tawh dawn tih a sawi a. LADC inthlanah beiseina sang tak an nei a, MADC lam an tlawh dawn a, minority-ah sawrkarna an siam mai dawn, tiin, ADC pathuma sawrkarna siam a beisei tih a sawi.
“MNF khan an sawrkar tirhin CADC thiah an sawi a, an thiat thei ta lo. MNF party chu Mizo tih niin, Chakma tan MNF nih a rem ve lo,” a ti.
Border trade chungchang sawiin Lalduhoma chuan, “Bangladesh hian Dampa bial Silsuri bul thleng kawng an rawn sial tawhin ka hria a, keini lamah sawrkar hmasaten an sawi ringawt a, hmalak a awm lo. Tunah hian Pukzing atanga Silsuri, Silsuri atanga Marpara inkalpawhna tha kan nei thuai anga, Silchar kawng chauh ni lo chak lakna hmunpui leh insumdawn tawnna hmunpui in ni tawh dawn,” a ti. Dampa bial Bangladesh dep chu sumdawnna hmunpui a nih thuai tur thu a sawi.
UT atanga kum 53 a nih tawh hnuin India rama district 800 vel awm zingah Dampa bial awmna district chu district changkang lo, ‘aspiration district’ zinga a la tel chu pawi a tih thu sawiin, “District changkangah chhuah an tum tih a sawi a ni.
Dampa bial chu kuhva, rubber leh hmuhphiah chinna hmunpui a nih avangin sawrkarin a ngaihsak zel dawn tih a sawi bawk.
India khua leh tui dik tak Chakma enhrang dawn lo
