India leh Canada inkara inremna zawnga inbiakna sang ber neihnaah Canada foreign minister chuan India nena kan inlaichinna chungchangah External affairs minister S Jaishankar nen thil chinchang an sawi dun reng thu a sawi. Toronto-a zawhna leh chhanna hun an buatsaihnaah Canada foreign minister Melanie Joly chuan,” external affairs minister S Jaishankar nen kan inbe renga kan inbe zel bawk ang,” tiin a sawi a ni. Minister level ah inbiakna hi a awm reng a ni tih hi a lehlam ve ve atanga an pawm tawn vawi khatna a ni.
June ni 18, 2023-a Khalistan hruaitu Hardeep Singh Nijjar, Surrey, British Columbia-a thah a nih chungchangah September 18, 2023 khan Canada Prime Minister Justin Trudeau chuan House of Common-ah “Inpuhna awihawm” tiin Indian agents te leh Nijjar-a thah a nih chungchang a lo sawi tawh a, Joly chuan hemi buaina sosang zel tur tih nep nan a theihtawpin hma a la mek a ni. Economic Club, Canada ah thu sawina hun neiin Joly chuan, “He hun rei lo te chhunga kan inlaichinna hian kum sawm tamtak a daih-in leh ram pahnih mipuite inkarah inkungkaihna tha tak a siam thei a ni,” tiin a sawi. Tun dinhmuna kan inlaichinna chuan “Hun rei lo te chhung ni mah se thil khirhkhan tak a ni,” tiin a sawi bawk.
Joly chuan, “Canada khua leh tui thihnaah hian inpuhna awihawm tak tih hi nghet takin kan pawm zel dawn a. Hei hi a nihna takah chuan Canada ram zalenna leh a ram mipui himna kan vawng nung zel dawn tihna a ni a. He thil thleng chungchangah hian India nen kan thawk dun zel a ni,” tiin a sawi. Trudeau-a thusawi hnu lawkah Delhi chuan ‘a theih loh’ tiin ram pahnihte chuan an palai ve ve te an inhnawhchhuah sak tawn a ni. October thla tantir khan India chuan Canada palai 41 lai te chu an awmna hmuna an awm reng chuan ram aiawh palai an nih ang pawha humhim an nih reng theih loh a hlauh avangin a lo hnawt haw tawh a. He thil hi Canada chuan a palaite “Inhnawhchhuahna runpui” a ti a, India erawh chuan palai hnathawktute siksawi tumna a nih thu a sawi thung.
Nijjar hi Sikh community atanga inlak hran tumtu pawl hotupa niin British Columbia-a khawsa a ni a, Surrey khawpui pan a tum mek laiin Guru Nanak Sikh Gurdwara-a motor dahna hmunah kah hlum a ni ta a ni. India erawh chuan Nijjar hi hel (Terrorist) ah a ngai a, a laka thubuai a thehluh te Canada court-in engtin mah a chhui zui lo niin a ngai ve thung a ni. Canada hian Nijjar thah a nih thuah New Delhi-a inrawlh dan chiang taka tihlanna a pe chhuak ve tur a ni.
India leh Canada inbiakna la kal zel
