Daily Newspaper

India leh China-in ramri chinfel nan hmalakna kalpui remti

30

Moscow-a darkar hnih leh a chanve chuang an inbiak hnuah External Affairs Minister S. Jaishankar leh Chinese Foreign Minister Wang Yi te chuan thla li chuang Line of Actual Control (LAC) a inngurna tihrehna tura inremna point panga siamin hmalak an rem ti ta.

“Foreign Minister pahnih te chuan ramria inngurna thleng mek chu ram pahnih tan a tha lo ve ve an ti a. Hei vang hian ramria ram pahnih sipaite chuan inbiakna neiin, a rang thei ang bera inhnuhdawkin, inhlat tawka awmin boruak tang an tireh tur a ni,” tiin joint press statement an tihchhuahah tarlan a ni a. Ram pahnih minister te hi buaina chhuah hnua hmaichhana an inhmuhna hmasa ber a ni.

Five-point plan siamah hian Prime Minister Narendra Modi leh President Xi Jinping tena ‘inhriatthiamlohna te buainaa leh vat loh’ an tih zah te, boruak tang tihreh nana inhnuhdawh, India-China border protocl zah leh buaina siam zual thei laka insum, Special Representatives NSA Ajit Doval leh Wang te inbiak chhunzawm bakah thil dang confidence-building awm theihna tur kalpui tih te a tel a ni.

Inbiaknaah hian Jaishankar chuan LAC hmun hrang hranga Chinese PLA tena sipai an dah belh leh ralthuam an chhek khawl chu a duh loh thu na takin a sawi nia sawi a ni bawk.

China lam chuan sipai an chhek khawl chungchangah hian chhuanlam rintlak tak emaw sawi tur an nei lo va. Chinese ral hmatawng tena LAC hmun hrang hranga boruak tichhe zawnga an chetlakna fo chuan ram pahnih tena inremna leh protocol an neih te zahlohna a lantir a. India chuan ramri chungchanga inremna lo awm tawh te chu zawm vek an phut bur bawk a, status quo thlak tumna reng reng a remti dawn lo tia sawi a ni bawk.

Ram hruaitu lawk ten inremna hmangin boruak tihziaawm an remti a, mahse, a kalpui tak tak tur te chu border commander te niin heng commander te hian sipai dahna tur chungchang te an la sawiho leh dawn a ni. Mahse, border commander te hi chuan June thlaa inbiakna neih tawh atang khan chet an la tawh chungin hmasawnna a awm lo hle thung a, tunah pawh eng tiang chiahin nge bawhzui a nih dan tur a chiang lo hlea ngaih a ni. Ram pahnihte hian April thlaa PLA tena an awp chin hmunah te status quo kalpui tur an ti chungin PLA te chuan sipai an la dah belh teuh teuh reng tho a ni.

“Tuna tih nghal tur chu friction area tin atanga sipai lak chhuah a ni a. Chu chu nakin zela thil duhawm lo thlen zui loh nana tihmakmawh a ni. Sipai dahna tur leh an permanent post tur te leh kalpui dan tur te chu military commander te kutah dah a ni ang,” tiin sorkar thuchhuak chuan a sawi.

China Foreign Ministry-in thuchhuah an siamah Wang chuan ram pahnih inlaichinna chu ‘kawng pengthuamah’ a awm mek, a ti a. “Mahse, ram pahnih ten inlaichinna kawng dika an kalpui chhung chuan harsatna hneh theih loh a awm lo,” a ti bawk.

Wang thusawi hi September 4-a Defence Minister tena Moscow a inbiakna an neih hnua thuchhuah nen a inang lo hle thung a. Wang chuan tun hnaia harsatna awm chungchangah India a dem lo va, tun hnaia China Foreign Ministry leh PLA te chuan India demna hlir an sawi thung a ni.

Mahse, Wang chuan ramri chungchanga China dinna nghet tak a sawi thung a, ‘tuna tihmakmawh chu silai hmehpuah leh chetdan hlauhawm tak tak ram pahnih tena an duh loh ve ve laka insum a ni,’ tiin a sawi a.

“Sipai leh hmanrua zawng zawng lakkir a pawimawh bawk” tia sawiin, “Ral hmatawng te a rang thei ang berin an insaseng nghal tur a ni a, chu chuan boruak sosang tur a dang ang. China chuan ral hmatawng sipai tena harsatna chinfel a nih theih nana inbiakna a thlawp a. China chu Indian te nen diplomatic leh military channel hmanga inbiakpawhna nei rengin ramriah remna leh muanna awm theih nan chet a la ang,” tiin China Foreign Ministry thuchhuak chuan a sawi bawk.

Wang chuan ‘China leh India tena ngaihdan inang lo an neih thin hi ram lian pahniha thil awm a ni’ tia sawi bawkin, “Heng ngaihdan inang lo awm thin te hi ram pahnih inlaichinna that nan a sawina turah ngaihtuah thin tur a ni,” a ti bawk.

“Ram lian pahnih chak taka hmasawn mek nih angin China leh India tena tuna an mamawh chu thawhhona a ni a, inbakkaihna a ni lo, inrintawnna leh inrinhlelhna ni lo a ni. Thil pawimawh ber chu inlaichinna nghet tha leh inrintawnna dah pawimawh a ni,” tiin a sawi bawk.

China thuchhuah chuan Jaishankaran India in ramriah buaina tihpunlun a duh lo, India in China laka a policy a la thlak lova, India pawhin China-in India laka a policy a la thlakah a ngai lo, a tih chu an tarlang tel bawk.

India thuchhuah chuan ramriah status quo thlak danglam a duh loh bur thu leh ramria inremna awm chu ram pahnih te inlaichinna kalpui zelna turah thil pawimawh hmasa a tih chungchangah Chinese Foreign Ministry chuan ‘India leh China inlaichinna chu ramria zawhna awm chinfela innghatah a ngai lo va, India pawhin a duh a ring hek lo’ a ti thung.

China thuchhuah chuan India-in May thlaa China chetlakna neih hmaa status quo neih let leh a ngiat thu sawiin mah se, ‘Indian te chuan China nena ramriah inbiakna hmanga harsatna chinfel ni se a duh a ni’ tiin a sawi bawk.

Ram pahnih foreign minister te inbiakna hi Moscow-ah Russian Foreign Minister Sergey Lavrov hmalaknaa neih a ni a. Russia-India-China te chuan bilateral talks an nei zui bawk a. Heta inbiakna hi Special Representatives meeting leh Working Mechanism on Consultation and Coordination on India China border affairs meeting-in a zui dawn bawk.

November thlaah Modi leh Xi te chu G-20 summit Saudi Arabia-ah an inhmu tura ngaih a ni bawk a. An inhmu a nih chuan ramri buai hnua ram pahnih hruaitu lu ber te inbiakna neih leh hmasakna ber tur a ni.

(THE AIZAWL POST – Ramchhung)

The Aizawk Post

Full>> ePaper Subscribe

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy