India chuan European ram pali European Union member ni ve lo te nen free trade agreement (FTA) an ziak.
European Free Trade Association (EFTA) te nena inremna an siam hmang hian India ramah heng ram pali te hian $100 billion vel investment an ti thei dawn tia sawi a ni a.
EFTA ah hian Norway, Switzerland, Iceland leh Liechtenstein te an tel a ni.
Hetih lai mek hian UK leh India te chuan FTA chungchangah inremna siam tumin inbiakna kum hnih chhung an nei tawh bawk.
“He inremna chhinchhiahtlak tak mai hi economic lama hmasawnna leh thalaite tana hna t]autet siama nih theih nana hmalakna a ni” tiin Prime Minister Narendra Modi chuan a sawi a.
“Hma lam hunah hnianghnara lo thleng dawnin EFTA ram te nena hmasawn tlangin kan inzawmna tihnghehzualin a awm ang” tiin a sawi bawk.
Inremna siam a nih theih nan hian kum 16 vel zet inbiakna neih a ni a. He inremna hnuaiah hian India chuan heng ram pali atanga chhiah leh industry bungrua kaihhnawh a khapna te chu kum 15 chhung a hlip dawn a ni.
Investment tihna tur hrang hrang zingah pharmaceuticals, machinery leh manufacturing lamte pawh huam tel tir vek a ni bawk.
“Inremna hmangin market awlsam zawka siam niin Indian leh EFTA business tena engkim awlsam taka an tih theih nana ruahmanna siam a ni” tiin EFTA thuchhuah chuan a sawi bawk.
He inremna a taka kalpui a nih theih nan India leh EFTA ram pali te hian an ramah theuh nemnghehna an parliament ah theuh tihfel ngai a ni a, Switzerland chuan nakumah an nemngheh nghal tur thu a sawi.
Tun hnai kum hnih chhungin India chuan Australia leh United Arab Emirates te nen trade deal an lo siam tawh bawk a.
Kar kalta lawk khan UK trade minister Kemi Badenoch chuan Britain chuan India nen trade deal ziak mai thei an ni tawh tiin a sawi bawk.
INDIA leh EFTA ten inremna
