India Olympic thlen beiseina thlawptu Sebastian Coe

India Olympic thlen beiseina thlawptu Sebastian Coe
International Olympic Committee (IOC) president ni ngar ngar Thomas Bach chuan tun March ni 20-a president thar thlan turah hian a chuh tawh loh tur thu a puang fel tawh a, a hmunruak luah tura rinkai ber leh World Athletics chief ni mek Sebastian Coe chuan 2036 Olympic Games thlen tuma thapui thawh mek India a thlawp thu a sawi a, hei hi India tan chuan chanchin lawmawm a ni ngei ang le!
Coe hian amah kawmtu PTI palai hnenah 2036 Games thlen tuma India dilna chu ‘case tling’ tak a nih thu sawi chungin hruihrual chhunga ram dang dangin an lukhum an thehl uh ve tho avangin inhruipawhna erawh khawng hle tura a ngaih thu a tarlang tel.
India hian IOC Future Host Commission hnenah 2036 Olympics leh Paralympic Games thlen duhna leh dilna, inhuamna ‘Letter of Intent’ a thehlut fel tawh a, a hlawhtlin ngei theihna’n an bei zui mek a ni.
He boruakah hian Coe chuan a ngaihdan sawiin, “Khawvel pum huap infiamna lian thlen tuma in inhuamna leh Olympic movement-a tel tura in thutlukna siam hian min tihlim takzet tih sawi ila mak in tih hranpa ka ring lo.
“Chutih rual erawh chuan, boruak hi han thlir ula, Games thlen hi chuti maia awlsam a ni dawn lo a, inelna a sang fer fer dawn khawp mai a, chuti chung chung chuan India dinna hi chu a boruak a te lo,” a ti.
2036 Olympics thlen tum hian Poland, Indonesia, South Africa, Qatar, Hungary, Turkey, Mexico leh Egypt-te pawh an inbuatsaih ve mek a, he’ng ramte nen hian India chu Games thlengtu nih inchuhin an inbei chho mek a ni.
2036 Games thlengtu hi kum 2026 herchhuah hma chuan hriat theih a ni rih dawn lo a, mahse, March 20 election-a IOC chief thar thlan rualin 2036 Olympic Games thlengtu tur hi an tifel nghal thung dawn a, tling tura rinkai ber Sebastian Coe berin India thlen dilna a hlimpui thu a sawi tawh miau avangin India tan chuan a ngaihthatthlak thawkhat rih awm e!
Coe hi thisena India nena inzawmna nei a ni ve pah bawk a, a nu lama a pu chu Indian niin, Punjab lam chhuak a ni a; Thomas Bach thlaka IOC president thar nih tum candidate pasarih zet zinga hming langsar leh rinkai ber a ni mek.
Kum 68-a upa Coe hi double Olympic 1500m gold medallist niin, India nena inzawmna nei a lo nih bawk avangin a pute chawrchhuahna ram hi a duhsak hle tih a thusawi dan atangin a hriat theih a, 2036 Games hosting rights hi a chang zo ta rih lo a nih pawhin India chu beidawng mai lo tur leh a hnu lam Games beisei turin a chah zui a, hei hian 2036 Games thlen hi India tan a chiang lo tih a nemnghet chiang awm e!
Briton Coe chuan, “Khawpui tam takin Olympic Games thlen tum hian dilna an lo thehlut tawh a, hlawhchham zingah beidawng duh loa a hnu lama Games thleng ta an awm fur a; phurawm deuh pakhat chu, kum 2005-a London-in 2012 edition thleng tura Paris an hneh kha niin, kum 2024 a rawn herchhuah meuh chuan Paris Olympic Games-ah kan inhmu leh ta tho tho a nih kha.
“Rio pawh chuti tho. Khawpui dang engemawzat ruala 2012 Games an chan zawh loh hnuin kum 2016 edition chu Britain hmakhalhin an dawl zui ta tho a, chuvangin, vawikhat hlawhchham hi engkim tawpna a ni lo a, kan lo dil tawh a nih phei chuan a lehpek atana awmkhai kan ni thei,” tiin India a fuih nghal.
Greek resort nuam zet Costa Navarino hmunah March 18-21, 2025 chhung hian 144th IOC Session nghah a ni dawn a, March ni 20 hian IOC member 100 chuangin vote hmangin an pawl president thar tur an thlang dawn a ni.
Hming langsar ber ni mek Coe bakah hian candidate dang paruk – Prince Feisal Al Hussein of Jordan, David Lappartient of France, Johan Eliasch of Sweden, Juan Antonio Samaranch Jr of Spain, Kirsty Coventry of Zimbabwe leh Morinari Watanabe of Japan-te chu thlan theih tur an ni ang.