India ram chu thuang hnih, BJP leh Congress lamin a kal a, Mizoramah chuan Congress party tih loh chuan BJP thurualpui thei awm an ni vek tih Congress treasurer Dr Lalmalsawma Nghaka chuan a sawi.
Aizawl South-II bial chhung Salem Venga Congress party huaihawt inkhawm a hmanpuinaah MPCC treasurer chuan Manipur-a Zohnahthlak MLA, BJP lam mite nen pawh Manipur buai hnu ah an inkawm a, a tirah hetiang hi an tawng ang tih an ring pha bik lo, tia sawiin, “Development kan hmuh theihna tur chuan, tiin central lamah thawhpui leh zawm an nei thin. BJP ‘double engine growth’ tia sawia malsawmna dawn boruakin min tuam a. Mahse hima kan inhriat laiin kan him loh zia chu Manipur-a thil thleng hian a tarlang chiang hle,” a ti a. An duhthlan fuh loh leh BJP an thlawp vangin tun dinhmun hi kan thleng ta tih a sawi.
Kan ram, hnam, sakhua himna’n mawhphurhna kan nei lian hle a, keimahni lo tumahin min sawifiah pui dawn lo, tiin, “Mizorama party dangte hian kan thupui hi min tawmpui lem lo pawh a ni maithei, vawiin thlengin BJP an la thawhpui tlat. BJP sum leh pai hmanga an tha tihchak tum pawh an la awm tlat a, tute nge an nih sawifiah a ngai lo,” a ti.
India chu thuanghnihin, BJP leh Congress lam anga a kal thu leh tute lam tang nge kan nih tih inngaihtuah a ngaih thu Dr Lalmalsawma hian sawiin, “UCC hmarchhakah kan hmang loang, pawh an ti maithei, thlamuanna tur a ni lo. Zofate ngei India hmun hrang hrangha in leh lo te neia khawsa an tam, India ah hian kan ringtu pui vaibelchhe tel an awm bawk,” a ti a. Mizoramah Congress tih loh chu BJP thurualpui thei awm an nih vek thu a sawi a. “Congress chu BJP nen ngaihdan inang lo, duhdan inang lo kan nih avangin engti kawng mahin kan thurual thei dawn lo,” a ti bawk.
India ram hi thuanghnih BJP leh Congress in a kal – Dr Lalmalsawma
