Daily Newspaper

India ramah Covid vanga thi 1,44,829; Mizoramah hri kaina hriat loh 14%

15

Aizawl, December 19 : India ramah Covid-19 vanga thi mi 1,44,829 an awm tawh a, hmarchhak bikah mi 2107 in thihpui tawhin, Mizoramah 7-in he hri hi an thihpui tawh. Hetih lai hian Mizorama hri kai hmuhchhuah tawh zinga zaa 14 chu an kaina chin hriat loh an ni.

December 18 chhun thlenga chhinchhiah danin India ramah Covid-19 kai mi 99,77,834 an awm tawh a, heng zinga 1,44,829 in an thihpui tawh a ni. Hmarchhak state-ah mi 2107-in an thihpui tawh a, Assam chu thi tamna ber niin 1010-in an thihpui a, Mizoram tih loha thi tlemna ber chu Arunachal Pradesh niin 55 an ni.

Mizoram Health Department hnuaia Integrated Disease Surveillance Programme hotute sawi danin, Union Health ministry-in December thlaa state hrang hranga Covid-19 taidarh dan tur an chhutlawknaah Mizoram chu 5,226 kai chho tura chhut a nih laiin, tun thlenga hri kai hmuhchhuah tawh chu 4,094 a ni chu a lawmawm lam a ni tih an sawi a. December-ah hian Mizorama hri kai hmuhchhuah 247-te dinhmun, IDSP-in a chhut danin, state pawn atanga kaisaa lo lut chu zaah 43 an ni a, tualchhunga inkaidarhna atanga kai zaah 41 an ni. Tu emaw atanga kai, an kaina chhui hleih theih loh chu zaa 14 an ni.

Covid-19 hri kaite hnaihchilh lo thei loa thawktu, frontline worker mi pathumin hri an kai tawh a, December thlaa hri kai hmuhchhuah zinga zaa 17 chu symptom nei niin, symptom nei lo hi zaa 83 an ni.

“Tunhnaiah Covid-19 kai hmuhchhuah hi tam viau lo mah se, kaina chin hriat loh hi zaa 14 an nih avangin Mizoram khawi hmunah pawh hri kai theia inngaih mai hi kan fimkhurna atana thil pawimawh ber a ni rih. Thlasik boruak nuam leh thengthaw tak karah hian thianzaho intihhlim leh picnic te, chhungkaw chaw eikhawm leh inthlawhpawhte hi thil chakawm tak a nih rualin, kohhran leh khawtlang bakah puipunna dangte thuawih taka kan insum lai hian, mahni leh kan chhungkhat lainate tam malsawmna kan nih theihna atan, tul loa chhuah leh inlenpawhte kan insum a ngai zel dawn a ni,” IDSDP state nodal officer Mizoram Dr Pachuau Lalmalsawma chuan a ti.

Tunhnaia zirchianna hrang hrang 54 khaikhawmnaa Covid-19 kai mi 77,758 an zirnaah, he virus unau dang, SARS-CoV leh MersCoV te aiin Covid-19 hi chenpui chhungkhatah inkai theihna hi zaah 16.6 in a sang zawk tih zirchhuah a ni tih a sawi.

“Hunpui kan nghahhlelh em em hun lai hi Covid-19 incubation period kan tih, kai atanga a lanchhuah hun mawi tawk vek a ni chho dawn a, he hun hlu tak hi kan chhungte bula hmang thei turin tan la ila, kan fimkhur loh erawh chuan khawhar takin Covid Care Centre emaw ZMC Covid Hospital-ah emaw kan hmang daih thei a ni tih hria in, hri kai lo tura fimkhur zel turin kan inngen a ni,” Dr Pachuau Lalmalsawma chuan a ti.

  • Mizoramah December 17-a sample endik, December 18 zinga result tihchhuahah hri kai hmuh thar 9 an awm a. Heti hian Mizoramah sample endik tawh 1,69,138 atangin hri kai hmuhchhuah tawh 4094 awmin, sample endik atanga hri kai hmuh hi za zelah 2.42 a ni.
  •  Hri kai hmuh thar 9 zingah hian ZMC RT-PCR laboratory-a sample 317 endik zingah pahnih hmuh thar an ni a. Tualchhung atanga kai nia hriat pakhat leh state pawn atanga rawn lut BSF mi pakhat an ni.
  • TrueNAT laboratory-a sample 173 endikah hri kai hmuh thar 4 an awm a. An vai hian state pawn atanga rawn kai sa vek nia hriat niin BSF mi pahnih bakah hna thawk tura rawn lut pakhat leh tualchhung mi pakhat an ni a, tualchhung mi kai hmuh thar hi nausen thla 9 mi a ni.
  •  Rapid Antigen Test hmanga mi 446 endik atangin hri kai hmuh thar pathum an awm a. Lawngtlai district mi   vek niin tualchhunga inkaidarhna atanga kai an ni.
  •  Hri kai hmuh tawh mi 4,094 atangin enkawlna hmun atanga dama chhuak tawh mi 3,940 an awm a, December 18 khan mi 17 an chhuak a, enkawl mek 147 an awm.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy