Tun hnaia zirchianna thar ber neihah diabetes leh non-communicable disease (NCD) nei thar Indians kum li (2019-2021) chhungin maktaduai (mtd) 31 an awm thar tia sawi a ni.
Zirchianna thil hmuhchhuah?
Kum 2021 khan zirchianna chuan India chuan zunthlum vei mtd 101 a nei a, prediabetes 136 million a nei a ti bawk a. Hei mai bakah hian mtd 315 te chuan high blood pressure an nei a, mtd 254 chu thau uchuak an ni bawk a, mtd 351 te chuan abdominal obesity an nei bawk a. Maktaduai 213 te chuan hypercholesterolaemia (arteries a thau tam lutukin heart attack leh stroke thlentir theihna) an nei a, mtd 185-in low-density lipoprotein (LDL) cholesterol an nei bawk an ti. Kum sawm chuang zirchianna neih hi Indian Council of Medical Research and Department of Health Research, Ministry of Health and Family Welfare te hmalaknaa kalpui niin Madras Diabetes Research Foundation tena an enpui a ni bawk a. Zirchianna te hi The Lancet Diabetes and Endocrinology journal ah tihchhuah a ni.
Zirchianna pawimawhna?
He zirchianna hi epidiomological research paper kimchang hmasa ber niin State 31 leh Union Territories te tuam niin mimal 1,13,043 lakah zirchianna neih a ni a. Zirchiannaah hian thil lian tham tak pahnih a awm a.
Pakhatna chu, zunthlum leh metabolic non-communicable disease heng hypertension, obesity leh dyslipedemia te hi rinphak bakin India ramah a hluar tih a ni a. Pahnihna chu khawpui hmun lamah te heng metabolic NCDs te hi thingtlang aiin a nasa zawk a, prediabetes bikah erawh tun atanga kum nga chhungin inenkawlna tha a awmloh chuan thingtlang lam a nuai ang an ti.
Zirchianna hian state hrang hrang leh region hrang hrang te danglamna pawh a tarlang a. Zunthlum tamna ber chu GOa, Puducherry leh Kerala-ah te a ni a. Prediabetes chu Sikkim ah sang berin hypertension chu Punjab ah a sang ber thung a. Generalsed obesity leh abdominal obesity chu Puducherry ah sang berin, Kerala chu hypercholesterolemia leh high LDL cholesterol san berna a ni thung. NCDs hniamna ber chu UP, Mizoram, Meghalaya leh Jharkhand te a ni.
Diabetes epidemic thu State-ah pawh a changkang deuhah chuan thunun that a nih laiin State dangah te chuan sanlam pan mek zel a ni bawk a. Hei vang tak han zirchianna chuan State mil zela policy siam leh inrawlhna neih ngai tiin a sawi.
Zirchiannain India a nghawng dan tur?
Tun hnai kum li chhungin India in zunthlum leh hypertension nei a ngah theih dan tur leh abdominal obesity tam zel dan tur a sawilan rualin hengte hi thunun a nih loh chuan mipui tam tak te chuan an nunphung tidanglam dawrh theih harsatna hrang hrang heng stroke te ang te an nei thei tih a ni a.
Mithiam te chuan India chuan harsatna pahnin inkawp tlat malnutrition leh obesity a hmachhawn mek an ti a. Surplus food a awm rualin fast food lam uar zel bakah mut tlem lutuk leh exercise lak tlem bawk si te chu NCDs thlentu atana duhthusam a ni an ti bawk.
Hma lam pan zel dan tur?
Heng pandemic thleng thei danna tur chhanna awm chu welness leh lifestyle tha diet hrisel leh exercise lak a ni an ti a. NCDs te chu Health Ministry-in a ngaih pawimawh em em niin NCD pali – cardiovascular diseases, cancers, chronic respiratory diseases leh diabetes te chu thlurbing bikah a nei a. Hengte hian zia inang an neiin chungte chu diet hrisel lo, physical activity tlem bawk si, tobacco leh alcohol tih nasat te a ni a. India ramaah health infrastructure tihchangtlun a, human resource development, health-promotion te leh invenna lam leh natna hriatchhuah vatna lamah theih tawpa hmalak niin chu chu NCDs treatment atana pawimawh tiin an sawi bawk.