India sawrkar hmalak dan azirin revolutionary party – MNF chu a inralrin a tul dawn tih an party treasurer K Vanlalauva chuan a sawi.
Thawhtannia MNF office, Mizo Hnam Runa inkhawmah MNF treasurer chuan, sawrkar laipui hmalak dan azirin revolutionary party a inralrin a tul dawn tih sawiin, “MNF hi revolutionary party kan ni a. Party chhung wing hrangah pawh national tih kan telh vek a ni. India-in ama thua min rinlut dodal ngam party kan ni a. Political party pariatin an party nuaiboin min zawm tawh. Hnam movement kalpui a nih laiin, ram leh hnam tan a nih avangin kan phunnawi ngailo a. Amaherawhchu, kohhran hoten, in thiltih hi tha lo kan ti lo, in dosaka te hian kan tlin tawhlo e, an tih avangin inremna lam kan hawi ta a ni,” a ti.
Remna leh muanna kawng kan zawhna hautak zia leh kawng thui zia kha thangtharten an ngaihtuah let a tul hle tih a sawi a. Hnam movement kalpui a nih lai ata, remna hnuaiah pawh finance department-ah kum 20 dawn a awm ve tawh a. Tunah chuan midang ken ve a tum tawh tih K Vanlalauva hian a sawi.
MNF chu mipui court-in thiamloh an chantir a. Campaign laia mipui hmaa an intiamna kha mipuiin hrereng se, mipui court-in lo enzui se a duh tih MNF hruaitu hian a sawi. “MNF sawrkarin sikul thahnem tak a dahngheh kha an dinhmun ngaia dahlet an nih chuan, mipuiin thiamloh an chantir ngei ang. Sawrkar thar hi a pawnga puia bei loin, mipuiin lo en zel se, mipui court-ah thiam an chan leh chan loh a lo lang mai dawn a ni,” a ti.
India sawrkar hmalak dan azirin kan inralrin a tul – K Vanlalauva
