Bloomberg-in report a tarlan danin Maldives ram President thlan thar Mohamed Muizzu chuan India sipai Maldives rama awm te chu chhuak turin a ti a ni.
He thliarkar ram leh a chhehvel-a China thawm a len viau lai leh India-in Maldives ram thawhpui tura hneh a tum mek laia India sipaite chhuak tura tih an ni hian India hmalakna nasa takin a ti thuanawp tih a chiang hle a, President thlan thar Muizzu chuan Maldives chuan tuma puihna ni loin indan a tum a ni, tiin Bloomberg chuan a sawi a ni.
President inthlan atana campaign laiin Progressive Party of Maldives candidate Muizzu chuan a khingpui Ibrahim Solih chuan an rama a duh duh dana India chet phal ah a lo puh tawh a ni. Muizzu chuan Solih rorel dan sawiselin Maldives ram zalenna chu India sipai te zalen taka an rama an chet tlat theihna nena siamrem vel mai mai a remti a ni, tiin a puh a ni.
Bloomberg TV-in an interview naah President thar chuan, “Hetah hian India ram foreign military an awm a ni,” tiin a sawi a ni. Amaherawhchu, Maldives-ah hian ram dang sipai awm reng reng phal a ni chuang lo ang, tiin a sawi a. India nen an rama sipai awmte tih tlem chungchanga an inbiak mekna sawiin a hlawhtling hle a ni tiin President thlan thar chuan, “India nen ram pahnih inlaichinna tha neih kan duh, chu chu kan hlawk ve vena tur a ni,” tiin a sawi a ni.
Bloomberg-in a sawi danin India-in a radar stations te leh thlawhna enthlatu a dahte vil turin sipai 70 vel a dah mek a ni. India indo lawng lian te chu Maldives-ah hian chawlh tir niin hei hian sipaite ral veng a pui nasa em em a ni.
President thar Muizzu chuan a duh dan tichiangin India-in an rama a sipai dahte titlem tura a tih hian China emaw ram dangin an sipaite an rawn dah ve thung ang tihna a ni lo, tiin a sawi a ni. President inthlannaa an sawi fo a khingpui Solih nen China nge India an ramin an zawm zawk dawn tih duhthlanna ang hial maia an sawi chungchangah President thar chuan Bloomberg TV, hrilh in “Khawvel ram zawng zawng nena intanpui leh thawhho hi kan duh a ni,” tiin a chhang a ni.
India sipaite inthiar chhuak turin ti
