India tlawhtu Canadian PM leh Modi-a inbia
Prime Minister Narendra Modi-a chu Thawhtanni khan Canadian Prime Minister Mark Carney-a ram khawpui bera Hyderabad House-ah an inbia a, ram pahnihte thawhhona tur leh thawhhona awm sa tihchak chu a ngaih pawimawh ber a ni.
Sawihonaah hian hruaitu pahnihte hian India-Canada Strategic Partnership-a kawng hrang hranga hmasawnna awmte an thlirho.
Canadian prime minister hian Prime Minister Modi-a sawmna angin Zirtawpni khan India a thleng a. Tun hi official-a India a tlawh hmasak ber a ni a, Mumbai-ah thlengin ram khawpui berah Thawhtannia hun a hman leh hnuah India a chhuahsan zui dawn a ni.
Thawhtanni tuk khan External Affairs Minister S Jaishankar-a pawhin Canadian prime minister hi a bia a, ram pahnihte inkara hma lam hun thlirtu thawhhona siam tura a inpekna chu lawmawm a tih thu a sawi.
Jaishankar chuan ram khawpui a tlawh laiin Prime Minister Carney-a nena an inbia chu lawmawm a tih thu X-ah a tar lang.
EAM chuan, “Tukina New Delhi-ah Canada Prime Minister Mark J Carney ka be thei hi ka lawm hle a. Hma lam thlira thawhhona tura a inpekna hi lawmawm ka ti hle a ni,” a ti.
Canadian prime minister hian Mumbai-a a tlawhah hun hlawk tak a hman hnuah Pathianni tlai khan khawpui ber hi a lut a. Union Minister of State for Commerce & Industry leh Electronics & Information Technology Jitin Prasada chuan tumhmunah a lo hmuak.
Thawhtanni khan Hyderabad House-ah Modi-a nen India-Canada Strategic Partnership hnuaia tun thlenga hmasawnna awmte thlirletin mi pawimawh dangte nen an inkawm bawk.
G7 Summit-a June, 2025-a Kananaskis-a leh November, 2025-a Johannesburg-a G20 Summit-a an inkawm tawhte chu thlirin hruaitute hian ‘sumdawnna leh investment; energy; ram leilung hausakna vâng chi; lo neih; zirna, zirbingna leh thil thar chinna leh mite inpawhna kawnga thawhhona an kalpui mekte an thlir dun a ni.
MEA thuchhuah tar lan dan chuan an chhehvel leh khawvel puma thil thleng meka an ngaihdan leh thlir dan pawh an inhrilh tawh bawk.
An inbiak bakah hian prime minister pahnihte hi India-Canada CEOs Forum-ah an tel bawk.
India tlawhtu Canadian PM leh Modi-a inbia
