British number one Emma Raducanu chuan California chhim lam thlaler khawpui Indian Wells lama grand slam tih loha tennis tourna-ment ngaihhlut hlawh berte zinga pakhat Indian Wells Masters khelh mekah nimin khan 6-1 2-6 6-4-a Beatriz Haddad Maia hnehin third round a paltlang.
Kum 20 mi Raducanu hian set hmasaberah tum 13 ngawt Brazilian world number 13 a break a, awlsam taka set lain, set hnihna erawh chiang zetin a hloh thung a; third set-ah thokang lehin, last 16 lamah world number one Iga Swiatek a hma-chhawn dawn.
Poland chhuanvawr Swiatek hian inkhel dangah Canadian Bianca Andreescu chu 6-3 7-6 (7-1)-in a hneh ve bawk.
2021 US Open title nena hmeichhe tennis khawvel a nghawrnghin dawt hnu khan Briton hian fitness chungchang-ah harsatna a tawk chho mawlh mawlh a, tuntum tournament tan dawn pawh khan damlohna leh banrek nain a tibuai leh a, a match hmasaber a khelh hma minute 20 chauh awm tawhah a inhnuhdawh dawn leh dawn loh a tichiang thei chauh a ni!
Kum 2021 New York khaw grand slam hnu lamah khan eng tourna-ment-ah mah thlensan tak tak a neih hleih theih tlat loh avangin ranking nei sang chin pawh a su mang lo tluk a ni a, tun hi khami hnu lama top-20 player a khelh leh vawikhatna chiah a ni nghe nghe.
Hmeichhe singles third round inkhel dangah Wimbledon champion Elena Rybakina chuan Spaniard Paula Badosa lakah 6-3 7-5 hnehna changin, France nula Caroline Garcia pawhin last 16 a luhna kawngah 6-4 6-7 (7-5) 6-1-in Ca-nadian Leylah Fernandez a paltlang ve bawk.
Qualifier Varvara Gracheva chuan eighth seed leh a chipui ni bawk Russian Daria Kasatkina hnehin Kazakhstan nula Rybakina a hmachhawn dawn a, hei hi hmei-chhe singles lama ‘upset’ lian a la ni rih.
Indian Wells-ah Emma kal zel
