Indian Wells semi lut Swiatek leh Alcaraz

Indian Wells semi lut Swiatek leh Alcaraz
World number one Iga Swiatek chuan Indian Wells title kawl zui turin hun tha a neih chhunzawm zel a, Ningani hmeichhe singles inkhel pakhatah straight sets-a Romania nula Sorana Cirstea hnehin semi-final a lut.
Kum 21 Pole hian world number 83-na Cirstea lakah 6-2 6-3 hnehna changin, nikum khan defending champion Swiatek hian California muana a champion-na kawngah vawiriat a lo chakzawn tawh a ni.
Nikuma French leh US Open title latu Swiatek hian nizan result tarlan hman lohah Wimbledon champion Elena Rybakina a hmachhawn zui leh.
Kazakhstan player Rybakina hian quarter-final dangah Czech Republic nula Karolina Muchova chu 7-6 (7-4) 2-6 6-4-in a hneh a, kumin January thla Australian Open-a a hneh tawh Swiatek hmachhawn turin last four a lut.
Fourth round lama Briton Emma Raducanu hnehtu Swiatek hian nizan semi-final match-ah chakin, final-ah chak zui leh se kum 1990 leh 1991 champion Martina Navratilova hnu lama he tournament-a hmeichhe singles title la zawn leh thei hmasaber a ni ang.
Hmeichhe quarter-final dangah Greece nula Maria Sakkari chuan set khatna hloh zet chungin Petra Kvitova lakah 4-6 7-5 6-1 hnehna a changlet a, a zawnin Indian Wells semi-final a lut.
Kum 27 mi Sakkari hian nizan last four inkhel pakhat zawkah Australian Open champion Aryna Sabalenka a hmachhawn a, result tarlan hman a ni lo.
Belarusian Sabalenka hian Nilaini khan semi-final lut turin American Coco Gauff lakah 6-4 6-0 hnehna a lo chang tawh a ni.
Mipa singles lamah world number one luahkir leh tuma tan khawh mek Carlos Alcaraz chuan 6-4 6-4-a Felix Auger-Aliassime hnehin semi-final a lut.
Spanish top seed hian Novak Djokovic hmakhalha ranking sang ber luah chho turin a la champion ngai lohna Indian Wells-ah hian title a lak ngei a ngai dawn.
Alcaraz hian mipa singles final luh inchuh pakhatah Italy player Jannik Sinner a tum dawn a; last four lut turin Sinner hian quarter-final dangah American defending champion Taylor Fritz chu 6-4 4-6 6-4-in a paltlang ve bawk.