Carlos Alcaraz-a kheimit hliam endik a nih hnuah Wimbledon champion hian Indian Wells-a a inlan theih ngei a beisei thu a sawichhuak.
January thla Australian Open quarter-finalist hian Rio Open-a a hliam chu ni rei vak lo a han awmhahdampui ang a, a title kawl lai humhim tumin Indian Wells a pan theih a rin ngheh tlat thu a sawi.
Kum 20 mi Spaniard hi Indian Wells tournament a khelh hmain a chipui Rafael Nadal nen Las Vegas exhibition match khel phawt tur an ni a, chumi chungchang chu social media lamah tarlangin, “Las Vegas leh Indian Wells lamah kan inhmu dawn nia,” tiin a fans tana thu lawmawm a hnutchhiah.
World number two Alcaraz leh 23-time Grand Slam champion Nadal-te hi March ni 3 khian The Netflix Slam an tihah an intum dawn a, chumi hnu chuan Grand Slam pali tih loha tennis tournament lian berte zinga pakhat BNP Paribas Open chu March ni 6 atangin Indian Wells hmunah an khel dawn a, he tournament-a champion lai Alcaraz hian Rio Open lama hliam a neih avangin a chin tur a chiang lo hman zet a, mahse, a inpeihchhuah hman tur thu social media kaltlangin a tarchhuak ta a ni.
Nilaini khan he thu hi Alcaraz chuan sawiin, MRI atangin a kheimit hliam chu ‘grade two lateral sprain’ a nih thu leh ni rei vak lo chawlh hnua kirleh theih hliam a nih thu a sawi.
NHS England website-in a tarlan danin, grade two sprain an tih chu hliam na lutuk lo (moderate injury) a ni.
Indian Wells thlirtu Carlos Alcaraz
