Iranian Foreign Minister Abbas Araghchi-a chuan President Vladimir Putin nena inbe turin Russia a thleng a, hei hi US leh Israel-in Iran laka indona an kalpui mek tihtawp tumna pakhat a ni.
Thawhtannia a thlen hlimah Araghchi-a chuan Iranian chanchinbute hnenah Russia a tlawh thu a sawi a, “Tehran leh Moscow inkara thil leh khawvel huap thilah inrawnna nghet tak neih chhunzawm zel tumna a ni,” a ti.
Putin-a nena an inhmu chu ‘indonaa thil thlengte sawi dunna leh thil thleng thar ber berte thlirletna hun tha tak a ni ang’ tih a sawi bawk.
“Hemi kawngah hian ram pahnihte inrawnna leh inremna siamte hi a pawimawh hle dawn tih ka ring tlat a ni,” a ti bawk.
Araghchi-a’n Russia a tlawh hi Muscat-a Omani thuneitute nena an inhmuh hnuah a ni a, Iran hian US nena inbiakna an neih leh theihna turin an chhehvel leh khawvel ram dangte thlawpna neih a tum a ni.
US leh Israel tang dunin Iran an beih atanga thla khat chuang zet a kal hnuah, Washington leh Tehran hian April 8 khan hun eng emaw chen inkahhai an remti a, la kalpui zel a ni.
Pakistan hmalaknaa inkahhai puan hnu hian Strait of Hormuz kaltlanga lawng veivahnaah buaina leh US-in Iranian lawng chawlhhmun a dan avanga buaina nasa tak a la awm a. Hetihlai hian Israel leh Lebanon inbeihna awm chian inbiak zelna a ti buai tel bawk.
An inkawmnaah Putin-a chuan Russia chu Iran thian nghet tak a nih chhunzawm zel tur thu a tiam.
Russia sorkar chanchinbute chuan Putin-a chuan Araghchi-a hnenah, “Kan lam atang chuan in thatna, he biala mipuite hlawkna tur kan ti ang a, remna pawh a awm thei thuai dawn a ni,” tiin a hrilh tih an tar lang.
President hian ‘Iranian mipuiten huaisen leh ropui tak an zalenna leh thuneihna vawn nana an beih dan’ chu a fak a, “Russia pawhin Iran ang bawkin kan inzawmna pawimawh tak chu chhunzawm zel a tum a ni,” a ti bawk.
Iran-in Russia lam a hawi hi US President Donald Trump-a’n Inrinnia Pakistan khawpui, Islamabad-a Special Envoy Steve Witkoff leh adviser Jared Kushner te Iran be tura tirh a tumna a thulhtur hnuah a ni a, Tehran hruaitute zingah ‘thu inhmuh lohna leh inhnialna nasa tak’ a awm tih a sawi.
Hetihlai hian Iranian President Masoud Pezeshkian-a chuan an lawng chawlhhmun kharsak an la nih chhung chuan Tehran chuan mi a be dawn lo tih a sawi nawn leh a ni.
US Central Command (CENTCOM) chuan an sipaiten Iranian lawng chawlhhmunte dangin Iranian tuipuiah lawng an lut leh chhuak thei lo a ni.
Trump-a chuan Iran chuan ‘tam tak pe mah se a tawk lo’ a ti a, Pathianni khan an hruaitute chuan inbiak an duh chuan ‘kan hnenah an lo kal thei a, a nih loh leh min rawn be thei’ tih a sawi bawk.
Araghchi-a chuan a hmain Islamabad-a inbiakna chu ‘a hlawk hle’ tih a sawi a, ‘Iran leh US inbiakna neih chhunzawm theihna tur thil tul bikte’ thlirlet tel tih a ni tih a sawi bawk.
Indo tihtawp tumna kal zelah Iran FM Araghchi-a’n Putin-a hmu
