Indonesia-ah cyclone vanga chin hriat loh 400-te zawng ngawrh

Indonesia-ah cyclone vanga chin hriat loh 400-te zawng ngawrh
Indonesia-a chhanchhuah hna thawktute chuan chawlhkar khat dawn cyclone avanga ruah sur nasa lutukin chhiatna a thlena mi 400 vel chin hriat lohva awmte chu zawn hna chu ngawrh takin an thawk mek.
Sumatra thliarkarah chuan thi hi mi 440 chuang an ni tawh tih sorkarin a sawi.
A tuartute hnenah puihna thilte chu thlawhna leh tuipui atangin pek an ni a, hetih lai hian khaw thenkhat chuan engmah an la dawng lo va, dam khaw chhuah nan mi ei tur leh tui ruk a nasa nia sawi a ni.
Ram thenkhat atangin puihna a thleng tan a, Malaysia pawhin chhiatna thlen nasatna ber pakhat, Aceh province-a hman tur damdawi a thawn.
Asia chhimchhak rama Thailand, Malaysia leh Philippines-ah ruah sur nasa hi tuarin mi maktaduai tel an buai mek.
Tun ang huna insiam khât tak, Cyclone Senyar insiamin Indonesia-ah hian ruah tam tak thlenin lei min leh tui lian a nasa hle a, chenna in tam tak tui lianin la a, a chim bawk.
National Disaster Management Agency chuan Aceh, North Sumatra leh West Sumatra-ah chin hriat loh tam tak an awm tih an sawi.
Agency hotu, Suharyanto chuan, “Central Tapanuli leh Sibolga khawpui pahnih phei chu ngaihtuah ngai zual tak an ni,” tiin a sawi niin AFP news agency-in a tar lang a. Thawhtanniah lawngin Sibolga hi an thleng dawn niin a sawi.
Sungai Nyalo khua, West Sumatra khawpui, Padang atanga km 100 vela hlaah chuan Pathianni atang khan tui lian a kâm tan a, in, lirthei leh thlai chinte chu chirhin a tuam nasa hle tih AFP-in a tar lang.
Thuneituten kawng an la thian fai tan lo niin mi chengten an sawi a, pawn lam atanga puihna an la dawng lo bawk niin an sawi.
Police thupuangtu, Ferry Walintukan-a chuan Sumatra-ah hian miin dawr an rawk tih thu an dawng a, police an intir tih a sawi niin Associated Press news agency-in a tar lang.
Tech billionaire Elon Musk-a chuan emergency-a an hman turin a thlawnin Starlink service a pe dawn tih a puang.
Asia chhimchhakah hian chhiatna a thleng nasa a. Thailand-ah tui lian vanga mi 170 chuang thiin Malaysia-ah thi an awm nual bawk a. Sri Lanka-ah pawh mi 190 vel lei min leh tui lian vanga thi awmin an ramin kum tam tak hnua khaw awm dan uchuak vanga chhiatna an tawh a tling.