Chanchinbu-a thuthar hmatawng chuan ka mit a la zar mai a, ka thingpui in lai pawh chawl meuhin ka han insiamrem te te a. Commerce & Industries Director H Lianzela’n Industrial Area-a hmun lo khuarte leh chenna atana hmangte chu 31st July, 2026 aia tlai loah Industrial Area/Estate chhuahsan tura a tihna a ni a. Aizawl leh a chhehvelah ah hian Industrial Estate/Area hi pathum awmin chungte chu:- Industrial Estate,Zuangtui, Luangmual Industrial Growth Centre leh Export Promotion Industrial Park(EPIP), Lengte te an ni a.
Heng Estate pathum huam chhunga dan loa hmunhma lo nei leh inbengbel te enfiah hna thawk tura Industrial Area Management Committee, Zuangtui an dinah 2011 chho velah khan Deaprtment aiawhin member pakhat ka ni ve a. Kan Chairperson Pi Esther-i, Secretary, Industries Department kaihhruaina hnuaiah vawi duailo Committee ka tel ve bakah Field visit pawh kan nei fo a.
Zuangtui hmuna Estate/Area bak hi hriat ka neih loh avangin Zuangtui Eatate bika ka tawn hriat ve te tlem han thlur zui ka duh a, a kimchang tehchiam lo na ang a, hma han lak dawna harsatna tam dan leh chutianga harsatna, sawrkar hmun leh hmun bik ni sia lo awm thei nge an nih tih leh tuin nge heti taka phalraia hnawhchhuah ngam hleitheih loha mi hi khawsa tlat nge an nih? tih hi ka zawhna hmasa ber chu a ni. Committee/Meeting ka tel hmasak ber ve tuma inkhawm kaihruaituin a thu hmasa ber chu ‘Risk Mual’ a ni a. Kei, Industry Department huanga awm ve ta lo chu ka hrilhhai viau nain Department lam officer te, helaia mutan lian tak lo sut tlang tum, sut tlang ngaihna hre lo ten thuhma an han neih kha chuan ka fiah ta uarh a.Field visit pawh helai Risk Mual atanga tana hmatiama kal tura inruahman kha kan ni a, Risk Mual chu thlen hlan ka nghakhlel khawp mai.
He mualah hian dan engmah thlawhchhan awm loin mi tam takin hmunhma an nei a, a thente phei chuan Land Settlement Certificate fel tak an nei a, (he mual hian a hming a pu zo hle, a risk huai huai an awm mai niin a lang?)keini Committee kha chu min hlau tehchiam lo, sawrkarin ram a pekna kha dik tak an hum miau a? Tichuan, eng Industry chhete pawh nei lo, chenna atana In sak ve ringawt engemaw zat kan han tlawh dan dan a. |henkhat chuan heng chenna In te hi anmahniin luah loin khawchhak lam unaute puantah engmawzat luah tirin In luahman chu an lo tel bawk a. Risk Mual kan han kal pel hnu chuan hmun dang kan han pan leh a, nuihzathlak angreng tak mai chu Geology & Mining Office kha a ding mauh mai a, hei hi Department lam chuan chhuahtir turin hma an la thui tawh a, Industry din duh tana hmunhma atan an lo earmark tawh nghe nghe a. Building la awmchhun erawh chu a la tha phian a.
A thawhhnihnaa field visit kan neih leh hma hian kan field visit neih tuma hma lak dan tur kan sawite engtianga hmalak nge a nih report kan ngaithla a, a thawhhnihna ka tel ve naah chuan kawngpui dung chuanghnuai lamah kan lut thla a, Industry hnuai nge a nih Bamboo Development Agency hnuai ka hre tawh lo- Bamboo chipping Industry kan hmuh chu Committee member thenkhat ten kan tlawh chhan an han sawi a, Geology & Mining Department Office lo ding kan hmuh ai chuan a mi den dan a dang hle. Industry Department hnuaia subsidy an lak, an hmang ve ngei anih tih fiah nana he industry tenau hi din a ni a, an nitin thawh chhuah leh hnathawktu an rawih vel zawhna an chhan dan chu a lungchhiat thlak hle. Kan kal zel a, sakhaw pakhat hian Biak In an lo din a,eng Industry nge a nih tih erawhchu chhiartu duhtak lo ngaihtuah ve tawh mai teh?
|angkai taka he Industrial Estate hmun hi hmang an awm nual a, tih takzeta ti an ni bawk a, hlawkna an tel tih pawh a chiangin hnathawktute han dawr vela thu han zawh pawhin ngaihthlak a nuam hle hlawm a. |umkhat chu he Estate-a dan loa hmunhma neihte nawr chhuahna ni pah fawmin leh Aizawl khawchhunga Industry tenau, Automobiles workshop, Steel & Alluninium workshops leh a dang dangte helai hmuna inbengbel duhte tan Interview kan koh bakah tuna Industry hlawhtling tak din mek tute pawh an la awm zel duh leh duh loh te kan zawt hlawm a. Hmunhma thar rawn sual duh te chu priority ah neiin hmunawl ni-a hriatte chu an tan han allot chhin a ni a. Kha interview hnu-a hmalakna tehchiam kan neih ka hre chiah ta lo mai ni loin kei hi Aizawl khaw pawnah min sawn tak avangin Committee member nihna pawh chu ka bansan ta a.
Tlangkawmna
Kum a liam tam ta hle a, he Industrial Area Management Committee hian thui tak hma an lain thil pawh siam that a neih teuh ka ring a. Mizoram Badminton Association ten Inddor Stadium lianpui a sak hi Industrial estate area chhung a ni nge nilo ka hrechiang hauh lo nain a lo nih palh chuan hmalak dan tur chu sawrkar level-ah siamfel a nih ka ring a. He stadium ram pawh hi mi pakhat duham tak mai hian engtin tin emaw a rawn tibuai reng a, thu kha an chingfel tain ka hria. Ni e, sawi tawh ang khan Risk Mual atanga an han nuai tan tur chu ka hre chak viau mai a, kan field visit neih laia Furniture workshop dintu pakhatin a LSC a hralh tih chiangtaka ka hriat te pawh kha engtin zel nge ni ang aw? ka lo ti ve a.nain kan hriatloh hnuah Risk Mual chu thuneituten engemaw chen chu an lo chingfel tawh mai thei bawk a.
Eng pawh chu ni se, he thupek hian nghawng tha tak a neih dawn rual rualin harsatna han sut deuh dat ngai chu an neih a rinawm a, Lengte lam Estate–a mimalin EPIP ram an rawn chuh reng te pawh khu chinfelna hun tha tak a ni awm e.
INDUSTRIAL AREA CHHUNGA AWMTE CHHUAK TURA THUPEK – R.Lalrinkima Hidden Lodge Chanmari, Aizawl
