Chief minister Zoramthanga kaihhruaiin National Bamboo Missions leh Asian Development Bank tangdunin hmarchhak state pangaa mau sawngbawlna tihhmasawnna tur hmalakna kalpui a tum – Bamboo Value Chain Development-in Northeast kalpui dan turah Mizorama mau sawngbawlna industry neitute nen an inrawnkhawm.
Tunhma deuh atangin kan rama mau behchhan industry-ten furniture lam hawi deuh vek ni mah se, kan mau neih sa hi an tet deuh avangin chutiang atan chuan a lo hmantlak vek loa, harsatna an tawk ta tih chief minister hian a sawi. “Heng industry-ten an hman theih tur mau lian leh chhah chinpun lamah sawrkar chuan hma a la mek a. National Bamboo Missions leh ADB tangdunin hma an lakna tur bikah hi chuan Pathianin kan rama a dah sa kan mau hman tangkai dan sawi ho turin industry neitute kan inkokhawm a ni,” a ti. Anmahni ngeiin kan mau neih sa hmang tangkai a, a hralhna awm an hria emaw India ram chhung leh ram pawna company lian zawkte nena thawh hona mumal tak an kalpui thei dawn emaw a nih chuan, sawrkar chuan theihtawpa thawhpuiin a tanpui dawn tih a hrilh a ni.
Horticulture secretary K Lalthawmmawia chuan National Bamboo Missions leh ADB ten NE state pangaa hma lak an tum dan a sawifiah a. ‘Chain development’ tih a nih angin, industry inringtawn leh eibang nawi nei lo (circular economy, zero waste) awmna tur Integrated Bamboo Development Park din chu a tum ber a ni tih a sawi.
Industry kalpui mektute chu Mizorama mau awmsa hmang tangkai tura ruahmanna an neihte a ranglama thehlut tura tih an ni a. Finish product emaw semi-finish product ang emaw pawh leng vekin, company lian zawkte koh luh leh thawhpuina lam hawi pawh, a hralhna lama harsatna awm lo tur mau hman tangkaina eng chi pawh rawt tura tih an ni.
Industry neitute nen tualto mau hman tangkai dan sawi
