Daily Newspaper

Inenthlakna ralthuam tha leh hlauhawm tak ni bawk Pegasus-in sawi a hlawh zel

31

Chanchinthar lakhawma thehdarhtu International grouop te chuan tun hnaiah spyware Pegasus chu politicians, journalist leh activists te ram hrang hrang 10 velah enthlak an nih thu an chuah a.

Pegasus project a tel zingah hian India rama The Wire te, UK a The guardian te, US a The Washington Post te pawh telin India ram bikah journalsist 40 vel, Cabinet Minister leh constittuional post chelhtu mi pawimawh tak tak te chu enthlak an nih thu an tarlang a.

He report hi Paris a inbun non-profit Forbidden Strotries leh Amnesty International tang kawp tena database an neih phone number 50,000 vel zet chu Pegasus siamtu Isareli compnay NSO te chuan an enthla tiin an sawi.

The Guardian chanchinbu chuan Amnesty International Security Lab chuan heng phone number enthlak nia sawite zinga 67 an test naah chuan 23 lai chu hlawhtling taka enthlak ngei an nih thu leh a dang 14 te pawh enthlak tuma beih tawk tiin an sawi.

Pegasus eng nge kan hriat dan?
Pegasus hian an enthlak tum phone-a lut turin kawng hrang hrangin a bei thin. A tir berah chuan spear phishing tih mai ‘hit or miss method’ an hack tum phone ah message hawn itawm tak a thawn thin. Tunah erawh ‘zero-click attack’ tia sawi software-a a derthawng laite hmangin phone neitu hriat hauh lovin an lut thei thin.

Kum 2019 khan WhatsApp-te chuan Pegasus-te chuan Android leh Apple a a derthawng lai hmangin phone an luhchilh theih thu an sawi a. Hei bakah hian Pegasus hi phone hmangtu bul hnaia wireless transmitter emaw manual in phone-ah chuan thun theih a ni bawk.

Pegasus hian phone chhunga a luh tawh chuan a tih hmasak ber chu ‘root privileges’ a nih thu Claudio Guarnieri, Amnesty International Security Lab enkawltu chuan a sawi a. Root privileges hi phone neituin a phone a thunun theih piah lama thunun sawina mai a ni. Hemi hmang hian Pegasus chuan phone chhungah awmhmun klhuarin amah thununtute nen inbiak pawhna a siam thei ta thin a. Chuta tang chuan phone a data awmte chu command-and-control centre ah a thawn ta char char mai a ni. Pegasus chuan a neitu hriat hauh lovin phone camera leh microphone te chu tinungin tinungin inenthlak nan a hmang thei ta thin a ni.

Pegasus hmangtute?
Pegasus siamtu NSO Group-te chuan ram hrang hrang 40 chuangah client 60 an neih thu an sawi a, mahse, tute nge tih chu an sawi duh hauh lo thung. Pegasus Project zirchianna kalpuiah hian spyware hi a bik takin ram 10 Azerbaijan, Bahrain, Kazakhstan, Mexico, Morocco, Rwanda, Saudi Arabia, Hungary, India leh United Arab Emirates ah te hman nasat zual a ni.

Pegasus hi cyberweapon anga ngaih niin Israeli law chuan sorkar hnenah bak hralh a remti lo. Hei vang hian heng ram hrang hranga Pegasus hmannaah hian chung ram sorkar te remtihna tel lo chuan hman theih a ni lo.

Forbidden Stories sawi dan chuan NSO hralhnaah hian Israeli Ministry of Defence chuan thuneihna sang tak a nei a, NSO tena an duh lo viau chungin Saudi Arabia hnenah pawh hralh a ni tiin a tarlang. Saudi journalist Washington Post-a thawk Jamal Khashoggi pawh kha Pegasus hmanga enthlak nia sawi niin Turkey-a Saui embassy a thlem luh a nih hnuah thah zui a ni.

India ramah pawh India sorkar chuan NSO spyware chu a lei nge lei lo tih engmah a sawi chiang duh lo bawk.

Tu te nge a thlurbing?
NSO chuan Pegasus chu mass surveillance hmanrua a ni lo tiin a sawi a, mahse, Morocco-ah phone number 10,000 chuang enthlak a nih avangin mass surveillance chu a ni ber tiin Forbidden Stories-te chuan an tarlang a. Pegasus chu crime leh terrorism beih nana ber hman tur tih a nih laiin khawvel pumah journalist 200 chuang lakah hman a ni bawk a, India ram journalist 40 te pawh an tel.

Pegasus database-a enthlak zingah hian French President Emmanuel Macron, Morocco atanga spy ngei nia ngaih; South African President Cyril Ramaphosa, Rwanda atanga spy ngei nia ngaih leh Pakistan Prime Minister Imran Khan, India ram atanga spy ngei nia ngaihte pawh an tel.

Indian client ni ngeia ngaih Indian leh Pakistani phone 2,000 zingah hian Opposition politicians, civil rights activist leh judge-te pawh an tel a ni.

India dan sawi dan?
Section 5(2) of The Indian Telegraph Act, 1885 chuan sorkar chuan ‘India ram tana pawimawh leh himna tur leh ram dang thiante leh mipui nawlpui him nan ‘message emaw class of messages’ te a dang thei ang a ti.

Kalpui dan tur leh hman dan tur te chu Rule 419A of the Indian Telegraph Rules, 1951 ah tarlan leh a ni a. Rule 419A hi Telegraph RUles ah kum 2007 khan 1996-a People’s Union for Civil Liberties (PUCL) vs Union of India case a thutlukna siam hnuah bilh tel a ni a, khatah khan Supreme Court chuan telephone a inbiaknate chu right to privacy huam chhung a mi a ni a, dan bawhchhiatna te a awm a nih loh chuan ngaihthlak ruk phal loh tiin a sawi a. Rule 419A hnuaiah mi enthlak emaw ngaihthlak ruk dawnin Central leh State level-a Home Secretary phalna lak hmangak a ngai a, mahse, hmanhmawhthlak bik thilah chuan Joint Secretary emaw a chunglam chin ten Home Secretary phalna lain remtihna an pe thei thung.

Kum 2017 a Supreme Court in K.S. Puttaswamy vs Union of India case a thutlukna a siamah enthlak chungchangah dan ang leh sorkarin dan ang thlapa remtihna a pek ngai a ti a. Hei bakah hian court chuan enthlakna kalpui chu hman sual a ni tur a ni lo a ti bawk.

Inenthlak phalna dan anga awm dang chu Section 69 of the Information Technology Act, 2000 niin hei hian electronic surveillance a thlurbing bik thung. India himna, security leh ram dang thiante leh public order kaihhnawih ram tana pawimawh thilah chuan sorkar chuan computer atanga information pekchhuahte lo dan emaw lo enthlak emaw a remti.

Electronic surveillance kalpui dan tur Section 69 in a remtihna hi Information Technology (Procedure and Safeguards for Interception, Monitoring and Decryption of Information) Rules, 2009 ah kimchang taka tarlan a ni a. Heng rules-te hi Apar Gupta, lawyer and executive director of the Internet Freedom Foundation chuan zau lutuk niin a sawi a.

Gupta chuan Pegasus hman hi dan kalh tia sawi bawkin Section 66 of the Information Technology Act a kalh tiin a sawi bawk.

Niv (Novalpina), Shalev, Omri NSO?
Kum 2013 a din NSO hi a dintu mi pathum Niv Carmi, Shalev Hulio, Omri Lavie te hming bul theuh lakkhawm mai a ni a.

Lavie leh Hulio hi Israel sipai intelligence tha chungchuang Unit 8200 a tang tawhte an ni. He Unit hian hna pakhat chauh an nei, chu chu signal intelligence siam a ni, signal intelligence chu electronic intelligence tih nen thuhmun reng. Carmi erawh Mossad, Israeli intelligence agency hlui a ni thung.

Tel Aviv bul lawka Herzliya-ah bul an tan a, a tirah chuan mi 50 vel an ruai a. Israeli venture capital fund Genesis Partners-a investor rual Eddy Shalev kahhruai te chuan NSO ah hian 30% chanpual nei turin $1.8 million an invest zui a ni.

An pathum hian inthurualin kum 2013 khan company an din ta a, revenue dollar maktaduai 40 an nei nghal zui a, a kum hnihna 2015 khan revenue maktaduai 150 an nei tling der.

Foreign company ten investment an tihbelh zel bawk a, American private equity fund Francisco Partners te chuan $130 million pe in NSO-ah share a nei tam ber zui a. Kum 2019 khan Shalev Hulio leh Omri Lavi te bakah Novalpina Capital chuan Francisco Partners atang hian an leilet leh a, Carmi chuan a chhuahsan tihna a nih chu. Tichuan NSO tiha N tih chu Novalpina tihna a ni ve leh ta a ni.

Hlawhtlinna liantham takin an tawng nghal a, khawvelin a hmelhriatna tak tak chu Mexican tena an hman atangin a ni. An bul tan tirh te a, an software hmangin Mexico chuan drug kingpin El Chapo an man theih phah ta a, khatih laia Mexican President phei chuan lawmthu mipui hriatah hming lam meuhin a sawi zui a ni.

Pegasus software hi software a ni lo, weapon system anga ngaih a ni a, Israeli sorkar chuan weapon system angin a ngai a, hei vang hian ram danga thawnchhuah pawh a thunun tlat a. NSO hian an software hi ram dangah Israel sorkar phalna tel lovin a pechhuak thei reng reng lo.

Kum 2019-a Lavie leh Hulio tena NSO an leilet leh khan a hlutna $1 billion vela chhut a ni tawh a. Kum 2012 leh 2021 inkar chhunga NSO in client a neih belh chu turu tham tak niin ram hrang hrang 40 velah client 60 vel an neia chhut a ni a. Chung zinga 51% te chu intelligence agency te an ni a, 38% chu law enforcement agency leh 11% chu military te an ni. Israel chuan Pegasus chu cyber weapon tia a sawi niin hei vang hian ram danga thawnchhuah a thunun tlat a ni.

Tun hnaia enthlak zinga tela sawi French president Emmanuel Macron chuan ISraeli Prime Minister Naftali Bennett biain Morocco security forces-te chuan pegasus spyware hmanga a cellphone an enthla ngei nia an hriat thu a hrilh a ni.

Morocco sorkar erawhin French president chu Pegasus spyware hmangin an enthlak loh thu an sawi zui nghal thung.

Pegasus spyware hian India ram pawh nghawng dawn chauhin opposition-te chuan sorkar chu insawifiah tura karin Pegasus software an hman leh hman loh tichiang turin an phut bawk a. Parliament monsoon session neih mekah he Pegasus kaihhnawih hi sawi zui hlawh tura ngaih a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy