Sports & Youth Services minister, Mizoram State Sports Council (MSSC) president ni bawk Lalnghinglova Hmar chuan Ningani khan Ramhlun Indoor stadium-ah Grassroots Sports Development Programme (GSDP) a hawng.
Sports minister chuan infiamna tihhmasawnna atana innghahna pawimawh ber chu grassroot sports a ni a. Naupang an nih lai atanga uluk leh mumal taka hmathlir fel tak neia kaihhruaia kan inzirtir chuan tun ai hian sports lamah kan thang duang thei dawn tih a sawi a ni.
He programme hlawhtlin theihna tura theihtawp chhuahtu School Education minister Dr Vanlalthlana leh Samagra Siksha Mizoram hotute, MSSC leh sports discipline hruaitute chungah lawmthu a sawi a ni.
Education minister leh Sports minister hriatpuina-in kumin January 13 khan Mizoram State Sports Council leh Samagra Shiksha Mizoram chuan thawhdunna thuthlung (MoU) an ziak a. He MoU hmang hian GSDP hi Mizoram hmun hrang hrangah kum 2025- 2026 chhunga kalpui tum niin, kumin September atanga chhiar tanin thla 6 chhung a awh ang. Zirlai kum 6-14 inkar, infiamna nihphung leh bul thut inzirtirna hmun tur a ni.
Sikul naupangte zirlai pangngai tibuai lo tura kalpui tum a ni a. Kar khatah nithum aia tlem lo training an nei thin anga, sikul chawlhah uar zawkin training an nei ang. Thla 6 chhungin minute 9000 vel training hman tura beisei a ni.
Training chhung hian sports bakah Mizo nun zemawi inzirtir, ruihhlo leh zuk leh hmuam that loh zia inzirtir tel tum a ni a. Hei bakah hian phak tawk theuhah vantlang tana tangkai, hmunhma tihfai leh enkawl pawh bilh tel tum a ni.
GSDP hnuaia sports discipline thlan dan hi Olympic vision sports leh popular sports enkawp chunga thlan a ni a. Kum 2025-2026 chhungin sports discipline 9 – archery, badminton, boxing, football, hockey, judo, taekwondo, weightlifting leh wrestling-ah hma lak a ni ang.
Infiamna chi 9-ah naupang hrual tan
