Infiamna lama hmasawnna atan
centre leh corporate hotute kawm
New Delhi-a cham mek Sports & Youth Services minister Lalnghinglova Hmar chuan Mizoram sports hmasawnna tur ngaihtuahin sawrkar laipui leh corporate-a mi pawimawh hrang hrang a hmu.
Thawhtanni khan Asian Development Bank country director Mio Oka kawmin Olympic Games 2036 leh National Games 2032 a Mizoram hmathlir a sawipui a. Sports kaltlanga khawpui hmasawnna (urban development), tourism, zirna leh skill development liantham kalpuina remchang a awm a, chutiang atan chuan a hmunhma tur pawh sawrkarin a nei tih a sawi. Mizoramin National Games 2032 thleng turin hmathlir a nei a, a tihlawhtling turin ADB-a Mizoram sports project awm mek chu chak zawka kalpuia thawhho a duh tih a sawi a ni.
ADB hotute chuan Mizoram Sports minister-in hmathlir thui tak a nei chu phurawm leh lawmawm an tih thu an sawi a. Zau zawka inrawnkhawm turin December thla chawhma lamah ‘Consultation Mission’ neia Mizorama an rawn zin tur thu an lo hrilh a ni.
Mizoram Sports minister hian NITI Aayog programme director & adviser for Northeast Yugal Joshi kawmin Mizoramin sports-a hmachhawp hrang hrang a neih a sawi a. NITI Aayog hotute chuan Mizoram sawrkarin line ministry hrang hrang hnuaia project a thehluhah NITI Aayog puihna leh thurawn an mamawh chuan pui tura an inpeih reng thu an lo hrilh.
HCL Foundation (Sports) hotute chu Lalnghinglova Hmar hian Mizoram House Chanakyapuri-ah a kawm a. State pum tuam chhuaka sports coaching kalpui tum leh Mizoram sawrkar hnuaia sports academy awm tihchangtlun kawnga thawhho dan tur an sawi.
Infiamna lama hmasawnna atan centre leh corporate hotute kawm
