Infiamna lamah department
pahnihin thawhdunna duang
Mizoram State Sports Council leh Samagra Shiksha chuan Sports minister Lalnghinglova Hmar leh Education minister DrVanlalthlana hriatpuina in Mizoram sports tihhmasawnna atan Thawhtanni khan inremna thuthlung (memorandum of understanding) an ziak .
Inremna thuthlung (MoU) hi MSSC aiawh secretary Henry Lalrawnkima leh Samagra Shiksha aiawhin SPD Lalthanzira ten an ziak a. Sports minister leh Education minister hi hriatpuitu an ni.
Samagra Shiksha hian Grassroots Level Sports Development (GSDP) an kalpui mek a. Tun sawrkar hian Bana Kaih Policy hmalakna peng khat atan thalaite theihna haichhuah programme state pum huapin chak taka kalpui a tum mek. GSDP hian naupang kum 6-18 a huam a, heng programme pahnih hi sports hmasawnna lama hmalakna tur ve ve a nih avangin, kalpui tum dan leh a huam chin inang diak diak lo mah se, thawhduna zaia khata (converge) hma lakin Mizoram chu sports-ah hmasawnna sang zawkah a hlankai ngei beiseina avanga inremna thuthlung hi ziah a ni tih minister-te hian an sawi.
Mizoram sawrkar flagship programme – Bana Kaih Policy kaltlanga nasa taka sports tih hmasawnna lamah hma lak tum a ni tih Sports minister hian a sawi a. Mizoram pum huapa thalaite theihna haichhuah programme kalpui tum mek niin, hei hian Mizoram chu sports-a tihhmasawn bakah Olympic 2036 tinzawna kan inpuahchahna a ni tel bawk tih a sawi. Samagra Shiksha hnuaia GSDP nen zaikhata luantir a remchan bakah changtlung zawk leh chak zawka sports lama hma sawn theihna tur a ni tih a sawi bawk.
Education minister pawhin MSSC leh Samagra Shiksha-in MoU an ziak chu lawmawm a tih thu sawiin, MoU kaltlang hian sports fund neih ang ang pawh awmze nei leh tangkai zawka hman kawng a hawn phah dawn tih a sawi a ni.
Infiamna lamah department pahnihin thawhdunna duang
