Madhya Pradesh-a Indore–Ahmedabad National Highway-a Nilaini zana inhlawhfa phur pickup truck chesualin SUV a sut zuinaah mi 12 an thi a, mi dang 23-in hliam an tuar bawk niin police-in an sawi.
Chetsualna hi zan dar 8:30 vela Chikaliya Phata-a petrol pump bula thleng a ni a. Report hmasaah chuan pickup truck-ah hian inhlawhfa 35 an chuang a, an hnathawhna, purun chinna hmun atanga haw lam an ni.
“Pickup truck hi a tlan chak hle a, a khalhtu hian thunun zo lovin vawi thum vawi li vel a let a, anmahni tawk zawnga tlanna kawngpui sir lehlamah per pheiin Scorpio nen an insu zui a ni,” tiin Dhar Superintendent of Police Mayank Awasthi-a’n a sawi.
A hmunah hian mi 12 an thi a, hliam na zual mi 10 chu Indore-a MY Hospital-ah thawn an ni a. Mi dang 11 erawh chu Dhar-a district hospital-ah enkawl an ni.
Indore Chief Medical & Health Officer (CMHO) Dr Madhav Hasani-a chuan damdawi inte chu rang taka chein Dhar atanga hruaite tan a tha thei ang ber enkawlna pek a nih tur thu a sawi.
Prime Minister Narendra Modi-a chuan he thil thleng hian a tihlungngaih thu a sawi a. “Madhya Pradesh-a Dhar-a chetsualna thlenga nunna chân an awm thu ka hriat hian pawi ka ti tak zet a. He thil rapthlak tak thlenga an hmangaih tak takte chânte chu thinlung takin ka tawrhpui tak zet a ni. Hliam tuarte dam thuai theih nan tawngtaina ka hlan a ni,” tiin X-ah a tar lang.
Prime Minister’s National Relief Fund (PMNRF) atangin thi chhungte chu zangnadawmna Rs. nuai 2 theuh pek an ni ang a, hliam tuarte chu Rs. 50,000 theuhva kan an ni bawk ang.
Chief Minister Mohan Yadav-a chuan Indore Divisional Commissioner leh Inspector General te chu Dhar-a tlan nghala damdawi lam ruahmannate enpui turin a ti a. “Hliam tuar zawng zawngte enkawlna a thlawna pek vek an ni ang. Thi chhungte hnenah sum leh paia tanpuina Rs. nuai 4 lakh theuh, hliam na tuarte tan Rs. nuai 1 theuh leh hliam tuar tenau tuarte Rs. 50,000 theuh pek turin thupek ka chhuah a ni,” tiin a sawi.
Inhlawhfa phur pickup truck chesualah mi 12 thi
