World record siam hi thil harsa leh hautak a ni thin a, eng thilah pawh a ber nih chu a khirh talh zel. Chutihlaiin record siam nan thluak tha leh thiamthil eng emaw tak neih a tulna thil a awm a, thenkhatah chuan thil harsa lutuk tur ni pawha lang lem lo, hruizen sei deuh neih chuan record siam mai theih ni te pawhin a lang ve deuh roh tho mai!
Guinness World Records-in khawvela inhruipawh sei bera an puan chu Tonbridge, Kent, UK-a inhruipawh an ni a, meter 558.15 (feet 1,831.20) a sei a ni. He inhruipawh sei record hi naupang kum 10 thian rual, Owen Calvert, Freddie Smith leh Otis Sampson te ngaihtuah chhuah a ni lehnghal.
He mipa naupang thian pathumte hian charity pakhat, War Child tanpui nan thil eng emaw tak tih ve theih an duh a. War Child chu indona avanga kawng hrang hranga harsatna tawk naupangte tanpuitu pawl an ni.
Tichuan, heng mipa naupang thian pathum te hian inhruipawh sei ber record siam zai an rel ta a, an thiante sawmkhawmin, an thil tum chu an puangzar ta a, record siamnaah tel tumin mi 490 an pungkhawm ta a ni.
Tichuan hrui sei tha tak, meter 558 laia sei chu inhruipawh nan an hmang ta a, Guinness guideline-ah chuan inhruipawh an tan tawh chuan hrui chuan a englai mahin lei a tawk tur a ni lo a, tang takin an inpawt ngei bawk tur a ni.
Owen chuan, “Record kan siam ta mai chu a ropui ngei mai. Hetiang thil a thlen theih nana thawk chhuak zawng zawng chungah kan lawm e. In tel lo chuan kan tithei dawn hauh si lo a,” a ti a, Otis pawhin, “He thil a puitlin theih nana rawn tel zawng zawng chungah lawmthu kan sawi a, War Child tan danglamna eng emaw tak kan thlen theih ngei kan beisei,” a ti a, Freddie chuan, “Tonbridge-in record kan siam e,” a ti bawk.
He inhruipawh record an siamnaah hian War Child tan pound 2,500 an tuak ngah ve nghal a ni.
Inhruipawh sei ber
