Inkahhai chungchangah Biden-a leh Netanyahu inbia

Inkahhai chungchangah Biden-a leh Netanyahu inbia
US President Joe Biden leh Israeli Prime Minister Benjamin Netanyahu te chuan Biden-a hun a tawp dawn mek laiin phone-in Gaza-a inkahhai a awm theihna tur leh mi hrente chhuah an nih theih dan tur an sawi dun.
Israel leh Hamas chuan inkahhai puan hi tha an ti ve ve a; mahse, inremna tura pawimawh eng eng emaw-ah an thu a la inhmu thei lo.
White House chuan Biden-a hian Lebanon-a Israel leh Hezbollah inkahhai puanin ‘an chhehvel boruak a siam dan’ te, Syria-a Assad-a lal ram a tluk te leh Iran thiltihtheihna a hniam hret hret dan te a sawi bawk tih a puang.
Netanyahu-a pisa pawhin Biden-a hnenah hian Doha-a inkahhai puanna tur inbiaten rawtna an neihte hrilh a nih bakah ‘mi hrente chhuah hmasak dan tura rawtna awm’ hrilh a ni bawk tih a puang.
Pathiannia inbiaknaah hian Biden-a chuan Gaza-a inkahhai chu a tul tak zet thu te, mi hren chhuah leh inbeihnain tanpuina pek a dal dan te a sawi a. Tun tum inbiakna hi October hnua puan zar leh hmasak ber a ni.
An inbiak hma ni hian Netanyahu-a chuan Israeli venhimna kawnga hotu sang rual – Mossad spy agency leh Shin Bet security service-a an director ve ve telin, Qatar-a Qatari, US leh Egyptian thuneitute rawtnaa inbiaknaa an ram aiawhte hnena thurawn pe turin a tir.
Israeli chanchinbute chuan Netanyahu-a hian a cabinet zinga inkahhai puan duh lotute pawh a kawm a, an hna bânsan phah lo turin a ngen niin an tar lang.
UK Foreign Secretary David Lammy pawhin Israeli foreign minister chu Jerusalem-a inremna a awm theih nana inbiakna kal mek hi a sawipui bawk.
Inrinni khan Donald Trump-a Middle East envoy Steve Witkoff pawhin Israeli prime minister hi a hmu a, January 20-a amah lak luh a nih hma inkahhai inremna ziak hman hram dan tur a sawipui bawk.
Trump-a hian White House a luh thlenga mi hrente chhuah an nih loh chuan ‘a pawi khawp ang’ tiin a lo sawi tawh.
Ningani khan US Secretary of State Antony Blinken chuan inremna chu ‘a hnai hle’ tih a sawi a, Trump-a lak luh a nih hmain ‘tihfel hman’ beisei a nih thu a sawi a. Inremna chu May thlaa Biden-a’n a rawtna hrul vek a ni dawn tih a sawi bawk.
Inkahhai inremna hi hnai hle anga sawi a nih mek laiin thil pawimawh tak tak a tam a, heng zingah hian inremna lailawk chuan inremna tluantling a daih dawn em tih te, Israeli sipaite chu Gaza atangin an insaseng vek dawn em tih te pawh a tel.
Gaza-a indona chhuak mek hi Hamas-ten October 7, 2023-a Israel chhim lam beia mi 1,200 chuang an thah leh mi 251 zet Gaza-a hren zui tura an hruai avanga chhuak a ni a. Israel chuan phuba lak nan Gaza rân zuiin Hamas chhut chimih tumin a bei.
Gaza-a Hamas enkawl health ministry chuan mi 46,500 chuang indonaah an thi tawh niin a sawi.
Israel chuan Gaza-ah hian an mi 94 hren an la nih thu a sawi a, an zinga 34 chu an thih tawh an ring a. Indo hmain Israeli pali ruk bo niin pahnih chu an thi tawh niin an sawi ve thung.