n Iran an beih atanga Tehran-in khawvela lawng kawng pawimawh ber pakhat, Strait of Hormuz a khar chu chawlhkar hnih chhung awh tur inkahhai chhungin hawn tura tihah tel mah se zalen taka kal theih a la ni chuang lo.
Kaltlang tum lawngte hian phalna nei lova paltlang an tum a nih chuan ‘beih leh tihchhiat’ an nih tur thu thu an dawng a, ni hnih liam ta chhungin lawng tlem chauhvin an paltlang.
Chawlhkar nga kal ta atanga buaina a chhuak atang khan kawngpui pawimawh khar a nih avangin khawvel eibarin a tuar a, energy man a tiche nasa hle.
Energy bakah microchip, damdawi leh lei tha ang chi siamna atana bawlhlo mamawh phurh chhuahna atan pawh he tuikawng hi a pawimawh hle bawk.
Indo lai khan nasa takin thil man a sang a, inkahhai puan tirh khan tuialhthei man pawh a tlahniam leh hman.
Lawng thil thawn lam hriate chuan tunah chuan a pangngai anga kal turin beiseina a la tlem rih tih an sawi.
Vespucci Maritime-a mi, Lars Jensen-a chuan, “Bungraw phurtu tam zawk chuan a him tawk tih a chianna an duh dawn a, chutiang chu engmah a awm lo,” tiin BBC hnenah a sawi.
India huna Ningani tlai dar 06:30 thleng khan inkahhai puan a nih hnuah lawng 11 (tanker pathum, container lawng pakhat leh bulk carrier pasarih) chauhvin strait an la kaltlang a. A bak lawng dang paltlang thei tlem an awm rin a ni bawk.
February 28-a indona a chhuah hma kha chuan ni tin lawng 138-in strait hi an paltlang thin a, tunah chuan a tlem rih hle.
Lawng kaltlangte pawh hi inkahhai vanga kaltlang thei an ni em tih a chiang lo va. Shipping analyst company Klyr-a mi, Ana Subasic-i chuan, “Inkahhai vanga hawn a ni nge, ngaihhnathiamna neia kaltlang an nih sawi theih a la ni lo,” a ti.
Jensen-a pawhin, “Engmah hi a la danglam tak tak lo,” a ti a, him taka kal tlang theih nan hun a la ngai dawn niin a sawi.
Inkahhai hnuah pawh lawngten zalenin strait la paltlang thei lo
