Inkahhai pawh sei hnu lawkah
Iran-in lawng pahnih man
US President Donald Trump-a’n Tehran nena inkahhai an kalpui mek pawh sei a ni dawn tih a sawi hnu darkar eng emaw zatah Iran chuan Strait of Hormuz-ah ram dang sumdawnna lawng pahnih a man a, an tuipui kamah an hruai.
Iran-a Islamic Revolutionary Guard Corps (IRGC) chuan lawngte hian tuipui dan bawhchhiain inbiak remna awm lovin tuikawng pawimawhah hian an lut niin an sawi tih an ram sorkar chanchinbuin a tar lang.
United Kingdom Maritime Trade Operations (UKMTO) centre-in a tar lan dan chuan Nilaini khan Iranian lawng sipaiten Oman bula bungraw phur lawng an kah hnuah an man a ni.
British maritime monitoring agency hian lawng captain chuan silai hmeh puah hma hian IRGC lawngin a hnaih thu a report tih a sawi.
“Lawng hi a chhe nasa a. Kangmei chhuak leh leilung tichhe thei thil erawh a thleng lo,” tiin UKMTO chuan a sawi bawk a. Thi leh hliam an awm lo a, lawnga thawkte chu an him vek nia sawi a ni.
Khawvela tuialhthei phurh hmun ngaa thena hmun khat vel kalna, Strait of Hormuz hi tuipui kawng pawimawh ber pawl a la ni reng a ni.
Lawng an man hian Iran-in tuikawng pawimawh kaltlanga lawng kal dan tur an thununna leh thuneihna a la neih zel dan a tar langa ngaih a ni a. Iranian thuneitu chuan he kawng hmangtu lawngte hnenah hman man pawisa chawi tur chungchang an sawiho mek nia sawi a ni bawk.
British maritime security firm Vanguard Tech chuan bungraw phur lawng kah hi Liberia flag intar niin Strait of Hormuz paltlang phalna a neih thu hriattir a nih thu a sawi a. Iranian news agency Tasnim erawh chuan Iranian sipaiten vaukhânna an pek a ngaihthah niin a tar lang ve thung.
He thil hi IRGC hnuaia Khatam al-Anbiya Central Headquarters-in Oman tuipuiah US-in Iranian sumdawnna lawng a man nia sawi a awm hnua vauna a dawn hnua thleng a ni tih IRNA news agency chuan a tar lang.
Iranian lawng hi kah leh a navigation system tihtawp nia sawi a nih hnuah Washington chu inkahhai bawhchhia leh ‘ralthuam nena lawng suama’ puh a ni nghe nghe.
Trump-a hian a hmain Pakistan sipai hotu, Asim Munir-a leh Prime Minister Shehbaz Sharif-a te ngenna avangin Iran beih a tum chu a tikhawtlai dawn tih a lo sawi tawh.
Truth Social-a thu a ziahnaah Trump-a chuan Iranian sorkar chu ‘a inthen nasa hle’ a, dinhmun inpumkhatna lantir turin hun a mamawh avangin thutlukna siam a nih thu a sawi.
“An hruaitute leh aiawhten inpumkhat taka rawtna an siam theih hma loh chuan Iran Ram Beihna hi chawlhsan turin min ti a ni,” tiin a ziak.
Iranian lawng chawlhhmunte erawh US sipaiten an la khar reng dawn tih sawiin, sipaite chu ‘inpeih leh thei’ tura tih an nih thu a sawi bawk.
He thu puan hi a hma ni chiaha a thil sawi nen a danglam hle a. Thawhlehni hnuah lamah chuan inkahhai kalpui a nih a rinawm loh hle tih a sawi a ni.
US leh Iran hian chawlhkar ruk indona an kalpui hnuah April 8 atang khan chawlhkar hnih awh tur inkahhai an kalpui tan a, Nilaini khan tawp tur kha niin Trump-a hian pawh sei a nih dawn thu a puang a ni.
Inremna tak tak a awm theih nan Pakistan hmalaknain Islamabad-ah an lo inbe tawh a, hlawhtlinna a awm lo va. Inbiak leh tumin palai hna thawktuin theihtawp chhuah mah se a la hlawhtling lo va, an mutan lian berah US-in nuclear programme a neih tihtawp vek a phut chu Iran hian a duh bik lo a ni.
Inkahhai pawh sei hnu lawkah Iran-in lawng pahnih man
