Daily Newspaper

INKHARKHIP HI INBUATSAIHNA HUN THA A NI

15

Mahmuaka Chhakchhuak

Aigupta rama saltanna hmun atanga Kanaan ram pana Mosia’n Israel fate a hruai lai khan an phunnawi nasa thin em em a. Nunna leh an tana hahdamna tur lam an pan tih hre reng mah sela eng vangin nge thi tura min hruai te an tiin Aigupta sa bel bula an awm lai te kha an ngai ngawih ngawih a nih kha. Khatiang ang deuh khan Lockdown hnuaiah hei ni tam tak kan awm ta a, thenkhatte hi chu an phunnawi nasa ta ngawtin a hriat a, inthlahrung hauh loin an theihna hmun hmunah an phunnawi a, thiam taka an han sawi bawk hi chuan alo awm-ang riauin thenkhatte hi chuan kan han hre zui mai thin bawk a. Tuna April 20, 2021 atanga Inkharkhip kan hman hi sorkar lamin an ruahman dan chuan July 31, 2021 thleng tur a ni dawn a, chuti a nih chuan ni 102 chhung lai kan inkharkhip dawn tihna a ni awm e. A rei char char hle mai a. |henkhatte chuan ning awm pawha lang loin pangngai takin an hmang emaw tih mai tur a nih laiin thenkhatte thung hi chuan nitin maiin social media lamah an nin tawhzia an sawi chamchi thung a.

Mihring kan inang lo a, kan duh zawng leh tha kan tih zawng pawh a inang hek lo, chutiang bawkin sorkarin a rampum ang huapa inkharkhip a han ruahman hi chanvo nei ve lo leh tih tur nei ve lo tan chuan ninawm tak tur a ni. Nimahsela, chuti chung pawh chuan rilru nei tan erawh inbuatsaihna hun tha tak a niin nikhat hun pawh hi hlawk takin a hman thei thung si. Engmah ti lo a zing leh tlai a chaw ei leh ngawt thinte hi inthlahrunthlakah an ngai a, zing thawhhlim atanga zan mut hma zawng hian darkar tin hi hlawk leh tangkai taka hman an tum thin a ni. Games khelh nilen thak thakte leh TV hmaa ni leng lenga thutte hi zahthlakah an ngai a, hun hlutzia an hriain tangkai taka hman an tum a, an awm mai mai ngai lo.

Chutianga tangkai taka hun an hman avang chuan an tan Inkharkhip hi a rei emaw rei lo emaw zalen takin mahni duhna kawnga insawrbingna hun atan an hmang a, nikhat hun hi hlawk takin an hmang thin. Nang leh kei ngei pawh hian he hun hi tangkai taka kan hman a tha a, Pathian zarah eitur lamah chuan harsa lutuk loin kan awm thei pawh a ni ang a, mamawh lutuk nei loin kan lo awm thei pawh a ni ang, chutiang pawh chu lo ni sela naktuk hun atana inbuatsaihna kan neih a ngai a ni. Vawiina kan awm ang hian kan awm reng thei lo mai thei a, chhungte thlazar hnuaia thlamuang taka kan awm ang hian kan awm reng thei kher lo thei bawk. Tuna nu leh pate thlazar hnuaia awmte tan ngat phei chuan he Inkharkhip hun hi mahni kea din theihna atana inbuatsaihna hun nise a duhawm hle a ni.

Mi pangngaite chuan puitling rual nih ve tawh a nu leh pate tiat uai nih tawh hnua nu leh pate hnena pawisa dil dilte hi a zahthlak tawhzia an hre telh telh a, mahni thawhchhuah ngeiin silh leh fen an leiin an mamawh an lei tawh zawk a, an thawhchhuahin a tlin ngang lo a nih chuan nu leh pate hnenah a dil chauh thin. Mizote hi puitling har tak kan niin a hriat a, nu leh pate thlazar hnuaia rei tak tak awm thin kan ni. Hei vang hian kan rilru pawh a puitling har a, mahni kut kea din kan harsat thin a ni. Tuna sorkar lamin Inkharkhip a han puang ngei te pawh hi thenkhatte chuan thinlung hnual phahna atantea hmangin hlawkna awm miah loin an hmang liam mai ang a, chutih laiin thenkhatte chuan hlawk takin an hmang thung ngei ang. Pathian zarah hnathawhna kawng zawh turin zalen takin hun ala rawn thleng chek ang a, chu hunah chuan inkharkhip chhunga inbuatsaihna tha tak neite chuan awh-awm takin hun an hmang ngei ang le.

Inbuatsaih tih avang hian ei leh bar zawnna kawngah chauh ni loin zirna kawngah pawh a ni a, kawng hrang hrangah pawh a niin mahni taksa enkawlna kawngah pawh a ni. Inkharkhip avanga mut chin tawk hre lo a, chhun leh zanah pawh mu reng tan chuan hri pui reh hun chu a hrehawmin awmdan thiam pawh a har duh khawp ngei ang a, thalai tan ngat phei chuan a zahthlak viau ang. Taksa sawizawina kawngah pawh he inkharkhip hun hi hun remchang tak a nih bawk avangin kan taksa sawizawi that a pawimawi viau mai bawk a, tunlai phei chu tlangval dul kiar tak tak hmuh tur an tam viau lehnghal a, a mawi lo ang reng hle a ni. Hriselna a that chuan taksa sawizawi pawh hi tih hram hram a tha a, nitina inbualte pawh zawngchhang atana pawi lo tak a ni.

Le, engti chuan nge kan inbuatsaih ang. A hmasa ber atan nangma thiamna leh tuina kawng chu hre chiang la, chutah chuan insawrbing turin thinlung buatsaih ang che. Eng kawngah pawh thawhrimna nen chuan hlawhtlinna a awm thei vek tih hria la, nangma kea din tumin thahnemngai takin thawk ang che. A tir atanga beisei lian tak kan neihna hian hlawhchhamnaah min hnuk lut fo thin a, rinchhan dang kan neihna hian mahni inrintawk lohna min nei tir bawk thin. Dik tak leh rinawm taka nitin hna kan thawh chuan chunglamin mal min sawm mai thin bawk a ni. Tichuan, Huan thlai siam tuimi i nih pawhin i huanah chuan thinlung zawng zawng pe mai rawh. New Zealand rama mi hausa ber berte chu huan thlai siamtute an nih theih chuan nang leh kei ngei pawh hlawhtling tlak turin kan thawk mai tur a ni dawn lawm ni? Midang kuhmuma par tum mai lo la, midang rinchhana hlawhtlinna kawng zawh pawh tum hek suh, nangmahah khan theihna leh chakna a awm tih hria la, mi hlawhtlingte leh mi hlawhchhamte tan hian Pathianin darkar 24 theuh min pek avangin i hun neih chu i hman thiam dan a zirin nangmahah hlawhtlinna chu a awmin a awm lo thei mai zawk a ni.

Hei vang hian Inkharkhip hi thenkhatte tan chuan chhiat phahna a niin chhiat hlenna hial pawh a nih theih laiin thenkhatte tan thung chuan hlawhtlinna kawng zawhna tura inbuatsaihna hun tha tak a nih theih avang nang leh kei ngei pawhin he hun hi eizawnna kawng zawh turin emaw ram rawng bawl tur hna thawk tur pawhin emaw eng kawng pawh zawh dawn ila inbuatsaihna atana hun tha tak a ni.

I hmalam hun chu i kutah a awm e.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy