Daily Newspaper

Inkharkhip leh tumna awm rih lo, mahse ngaihtuah chawp theih reng

12

Aizawl, December 21 : Krismas a hnai a, hrileng laka inven nan Europe-ah chuan inkharkhip tum an awm nual tawh. Mizoramah chuan inkharkhip tumna a awm rih lo a, mahse inkharkhip chungchang hi ngaihtuah chawp theih reng a nih thu thuneitute’n an sawi.

“Kan dinhmun hi Pathian khawngaihna azarah a tha rih a. Hetiang a nih chuan (lockdown) hi kan tih ka ring lo. Mahse a tul a nih chuan ngaihtuah chawp theih reng a ni,” tiin health minister Dr R Lalthangliana chuan The Aizawl Post a hrilh.

Hri vei enkawl mek zat a tlem telh telh thu a sawi a, harsatna lian tham a awm rih lo tih sawiin, Kristiante hunpuiah inkharkhip hi ngai lo hram se an duh thu a sawi. Chutih rual chuan, “He hri hi, zan hnih khat leka darh huk thei a ni a, chuvangin a tul a nih chuan inkharkhip hi rawt thut theih, ngaihtuah mai theih reng a ni a. Kan tan tlan a ngai a ni,” a ti.

Inkharkhip tumna awm rih lo mah se hri do hna hi ngawrh taka thawh tum a nih thu leh khauh lehzuala kal tum a nih thu sawiin minister Dr Thangtea chuan, “Strict taka kal kan tum a, chutiang tur chuan kan rel a, a chah pawh kan inchah a,” a ti.

Dawr, hming ziah ngai pawimawh lo te, khawlaia hmai tuam lo te, dan zawm lo te lakah khauh tum a nih thu leh police lam pawh chumi tur chuan inring tih a sawi.

Health and Family Welfare Board vice chairman Dr ZR Thiamsanga, MLA pawhin inkharkhip tumna a awm rih loh thu a sawi a, “Mahse thil a inthlak thut thei a, a tul a nih chuan lockdown chu puan theih a ni ang a, lockdown a ngaih loh nan kan tan a ngai,” tiin The Aizawl Post a hrilh.

Tunah rih chuan inkharkhip a ngai rih lo tih a sawi a, inkharkhip a ngaih loh nana tan zel a tul thu sawiin, “Krismas laia inkharkhip a ngai ang tih a hlauhawm a. Krismas zawhah kum tharah inkharkhip a ngai mai ang tih te pawh a hlauhawm a. Chuvangin inthlahdah lova kan tan a ngai,” tiin, khauh taka dan lekkawh tum a nih thu a sawi bawk.

Covid-19 chungchanga Mizoram sorkar thupuangtu Dr Pachuau Lalmalsawma, IDSP programme officer pawhin inkharkhip tumna awm rih lo mah se rel chawp theih a nih thu leh Mizoram dinhmun azira ngaihtuah tur a nih thu The Aizawl Post a hrilh.

Europe ram hrang hrang an inkharkhip tur thu sawiin, anni chu an dinhmunin inkharkhip turin a nawr tih a sawi a, “Keini chu Pathian zarah chutiang chu kan ni rih lo a,” a ti. Mizoram chu a hun takah a inkharkhip thin tih a sawi a, “A mak khawp mai, a hun takah kan lo inkharkhip thin a. Sapho pawh hi inkharkhip lovin an intizalen leh thin a, tunah inkharkhip a ngai leh ta a ang. Kan lockdown hnuhnung ber te kha tun thlengin a zar kan la zo a, kan lo in-lockdown thin avangin tunah hian a ngai rih lo tihna a ni a, a lawmawm khawp mai,” a ti.

Chutih rual chuan, thil a inthlak thei reng tih Dr Malsawma chuan, a sawi a, “Kan dinhmun azirin ro chu rel zel a ni ang. Kan dinhmun hi inthlak thei reng a ni a, dinhmun thaa kan awm reng theih nan kan vaia kan tan a ngai,” a ti.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy