Inlaichinna vawn that theih dan

In intawn tirh khan in inkar a tek deuh sek sek a, engkim mai kha a ni deuh zaih a, engtik lai pawh a awm dun reng theih in chak a, in inkhawih neuh neuh reng a, a text i chhiar ringawt pawhin a tihlim thin che a nih kha.
Mahse, hun a kal a, tunah chuan in inhau ta fo. Bedroom-ah pawh in inthlahlel ta vak lo ni ten i hria a, i rilru te a hnena phawrh pawh harsa i ti ta. Inlaichinnaah inhauh ve zauh zauh chu thil pangngai a ni, mahse, in pahnih inthlakhlelh tawnna te kha a tlahniam ta deuha i hria a nih chuan tan lak thar a ngai a ni. Ngaihdan inan lohna te in nei a, fa neih chungchangah a ni emaw, pawisa hman dan turah a ni emaw inremsiamna neih ngai ang chi chu a buaithlak deuh mai thei, chutiang ni lem lo harsatna satliah deuh leh a neuh neuh ang chi chu ama tawkin a fel ve leh mai thin a, khukpui hluai kher a tul hran lo.
A chhuak turin room hnawk zetin a kalsan a, i hawin a lo la hnawk hle a. Tlailam nam deuh ther ther te a ching a, WhatsApp tih vel hmanga inhauh te a ching riau a, chung chuan a tihrehawm rilru hle che. Chutih rualin tute pawhin inlaichinnaah hian harsatna eng emaw chu kan nei theuh a nia. A tu-a-mah kha in famkim bik lo a, a tihdan tha erawh inharsatna te sawi dun a ni, chutihrualin harsatna chauh sawi dun tur a ni lo, kan hlimna leh lawmna te, tha kan intih tawnna te, kan induhna te pawh sawi dun thin tur a ni, chu chu harsatna sawi dun ai mahin a hlawk zawk.
Relationship expert leh therapist Dr. Karin Anderson Abrell chuan, “In inlaichinnaah thil duhawm leh tha intih te kha sawi dun ula, in hlimna leh lawmna te sawi hmasa ula, chumi hnuah harsatna chu sawi chauh rawh u. Chutianga intih theih chuan in inlaichinna chuan hma a sawn ngei ang,” a ti.
Tunlaiah chuan mahni tawka inawmtleina thil chi hrang hrang kan ngah ta hle, a bik takin smartphone te hi kan kawppui te ai pawhin kan khawih ngun zawk fê mai. Hei hian kan hriat loh karin kan inlaichhinnaah nghawng a lo nei nasa thei hle a ni. Dr. karin Anderson Arbell chuan weekend-ah (weekend pum kan thei lo a nih pawhin nikhat chauh tal pawh) technology lam dahbo daih ila kan hlawkpui ngeia a rin thu a sawi a, “Nupa tam tak chu an nupaa hun hman aiin an phone screen bih nan hun an hmang tam zawk a, chuvangin technology dahbo hmaka, text, email, tweeting leh engmah post lo va hun hman tum ila. I phone, tablet emaw computer emaw khawih loin thildang ti zawk rawh u,” a ti.
Zawhna inzawh tam a pawimawh. I bula zantin mu thin kha hriatchianna hun i nei em? Khai le, han inzir tha leh teh u. Eng nge a duh zawng, a duh loh zawng, a hmuhnawm tih zawng, a tui tih zawng, a mawi leh nalh tih zawng, a nuam tih zawng, a ngaihtheih loh zawng tih te khan ngaihtuah la, zawt hreh suh. Engin nge tilungawi lo hmaa, engin nge tihlim thin tih te pawh. Chutiang chu inzawt ula, in inhriatchian hnuah chuan mak i tih zawk hial khawpin in inlaichinna a siamtha thei ang.
Text romantic deuh te inthawn thin rawh u. Inngaihzawn laiin love letter thlum tak tak kan inthawn a, tunlaiah erawh love letter thawn a ngai tawh lo, WhatsApp thlengin kan nei tawh. Inngaihzawn laia thu thlum tak tak kan infah kha, inneih hnuah pawh chhunzawm zel tur a ni. Chu chuan in inlaichinna a siamtha ngei ngei ang. Chhunah in inchhuahsan a, zanlamah chauh romantic tum tur a ni lo va, zanlama romantic-na tur boruak kha chhun a in inchhuahsan lai atang khan a boruak a siam theih daih tawh. I kawppui chu text thlum deuh han thawn zeuh la, in zanlam boruak chu a fuh zaih tawh mai ang.
Relationship expert Dr. Jane Greer chuan kan lawmna tihlan leh lawmthu inhrilh hi hmangaihna tihlanna pawimawh tak niin a sawi a, “Kan lawmna leh hlimna kan inhrilhhriat te hi hmangaihna chikhat a ni,” a ti. “I kawppui chuan thil ropui tak a tihsak kher lo che a ni thei, mahse, zanriah a lo chhum sak che a, in in te fai takin a lo enkawl a, chutiang thil tê tham mai mai ni a langah pawh lawmthu inhrilh ula. Inchhung sekrek khawih te pawh an tih tur ve rengah ngai mai loin thil fel taka an tih thin avangin lawmthu inhrilh tur a ni,” a ti. Hei hian inlaichinna chu kan hriat loh karin a lo siamtha dawn a ni.