Site icon The Aizawl Post

Inneihnain a thlen tura kan ngaih, ni si lo!

Nupaa insiam chuan thil engkim tifel duak mai turah kan ngai a- kan inneih chuan kan hlim sawt kan ring a, kan nun a kim dawn ni ten kan ngai. Relationship lama mithiam te chuan nupaa kan insiam vanga thil thleng tur ni a kan rin, mahse, kan rin ang ni leh si lo a awm niin an sawi a, kan rawn tarlang e.

1. I hmangaih tak in inneih chuan i lungleng tawh lovanga, kan mal tawh lo turah kan ngai. Mahse, inneihna hian chutiang chu min thlen kher lo. Mi lungleng chi chu a la lungleng tho. Lunglenga, mal riaua inhre thin ten nupui neih chu engkim siamthatna tur emaw an tih chuan an inngaihtuah nawn leh a ngai a ni.

2. Nupui emaw pasal emaw neih chuan hahdam ta deuh turah kan inngai thin, mahse, chutiang a lo ni lo. A bik takin a eizawngtu zawk tan phei chuan a hma aia nasa lehzuala hnathawh a ngai tawh zawk.

3. Mo dinhmuna ding tur zawk hmeichhia ten kan pasala chhungte nena boruak tha tak neih kan inbeisei a, min lo hmangaih ve nghal a, an fanu anga min lo en ve nghal mai kan beisei thin. Mahse, chutiang a ni lo, mahni fahrin te kan hmangaih dan leh mo te kan hmangaih dan chu a inang tak tak thei lo. Chuvangin pasal nei turte tan, kan pasala chungte, a bik takin an nu te lakah kan beiseina tihsan lutuk tur a ni lo.

4. Nupa inkara eng emaw neuh neuh nei te emaw, chhungkuaa buaina nei thin te pawhin fa han nei ila engkim a fel duak maiin kan ring thin. mahse, Chutiang a ni lo. Fa neih te hi uluk taka ngaihtuah tur a ni a- ka inpeih tawh em? Kan pahnihin kan duh dan a ni em? Chhungkaw enkawl turin kan inpeih tawh em? Nu leh pa ni turin kan inring tawh em? tih te hi ngaihtuah lawk tur a ni. Buaina chinfelna tur nia rin vanga fa neih ngawt te chu buaina belhchhahtu mai a ni zawk thei a ni.

Exit mobile version