MAMCO hnuaia dan ni loa sum inlaksakna thila inhnamhnawih ve nia puh, tuna ZPM MP candidate Richard Vanlalhmangaiha chuan he puhnaah hian a fihlim tih sawiin, thu dikloa amah tihmualpho tumnaah court-ah criminal complaint a thehlut.
Thawhtanni khan Richard Vanlalhmangaiha hian Aizawl District Court Judicial Magistrate first class-III hnenah complaint hi a thehlut a. A thehluh zawha Court tuala thuthar thehdarhtuten an kawmnaah, social media-ah dik lo taka puh a nihnaah thudik hailan tha in a hria a, criminal complaint hi a thehlut tih a sawi.
“He thilah hian zaa za in ka fihlim a, keima kutah pawisa pakhatmah a lut lo. A pawimawh lai ber chu, pawisa kha khawnge a luh a, tu hnenah nge a kal tih kha a ni a. Keima kutah hian cheng khat mah a lut lo tih ka sawi duh a ni,” a ti. An office chuan tuna puh tel a nihna sum hi a dawng ngei a, a dawngtu lo hriatpuitu (witness) ah pawh a tang a. A pawisa kalna kha Anti Corruption Bureau-in a chhui a, amahah chuan chhuiluh tur a awm lo hrim hrim tih a sawi.
Hnahlan grape winery tanpuina tur sum, sawrkar laipui atanga sawichhuahah 35% la anga puh a nihnaah pawh a fihlim, tia zawhna chhangin, hemi chungchang chu Hnahlan winery lamin sawifiahna an siam bak kha sawi belh tur a nei lo tih a sawi a ni.
Tunhnai khan ZPM MP candidate Richard Vanlalhmangaiha hi kum 2012-a MAMCO assistant manager a nih laiin, contractor 8 leh mimal thenkhat hnena contract hna hmuhsak tiama cheng nuai 268 laksaka bumtute zingah a tel nia puh a ni a. He thu hi social media a vawrh darh a ni. Richard Vanlalhmangaiha hian heng an puhna hi thu belhchiandawl lo leh politics-a intih hmingchhiat tumna mai a ni tiin criminal complaint hi mi pathum – David Sail (Facebooker), Lalrammuanpuii Izu (Tuesday Nightmare Youtube channel), leh Tlanghmingthanga, Mission Vengthlang te chungchangah investigation kalpui a, warrant of arrest tichhuak tur leh Section 500, 419, 505 leh 34 IPC, R/W 66D IT hmanga hremna pe turin Aizawl Police Station leh Cyber Crime Police Station officer -in- charge te a dil a ni.
Zawhna dang chhangin ZMP candidate chuan, an boruak a tha a, Mizoram dung leh vang an fankual tawhnaah party dangte an kal ve ngai lo emaw ni tih tur khawpin party dang boruak a dai tih a sawi.
Inpuhnaah ZPM candidate-in court-ah complaint a thehlut
