Inremna siam turin India-in
Washington pan dawn – US palai
India-a US palai (ambassador), Sergio Gor-a chuan ram pahnihte insumdawn tawnna chungchanga inbiakna kalpui mekah India palaiten tun thla tawp lamah Washington-ah an tlawh dawn tih sawi.
X-ah US palai chuan President Donald Trump-a’n sumdawnna thila a ngaih pawimawh ber, Asia chhim leh lailia nena inremna siam chungchangah Trade Representative Jamieson Greer-a nen inbiain ‘thil hlawh tak an sawi dun’ tih a tar lang.
“US leh India hian a hmain sumdawnna inremna an lo siam tawh a, tun thla tawp lamah Washington-a India palaite lo lawm turin kan nghakhlel hle a ni,” a ti bawk.
Union Finance Minister Nirmala Sitharaman-i pawh Washington-a inbiaknaa tel tura ruahman a ni a; mahse, BJP hruaitu hian US hi a tlawh ve dawn lo.
Sitharaman-i hi Lok Sabha leh state assembly-a hmeichhiate tana seat 33% hauhna kalpui dan chak zawk tura bill siamna tur sawihonaa tel turin parliament session-ah a tel dawn a ni.
India leh US hian thla tam tak chhung inbiakna an neih hnuah February 2, 2026 khan insumdawn tawnna thuthlung an puang a. Hruaitu pahnih – Trump-a leh Prime Minister Narendra Modi-a te chuan he inremna hi ‘chhinchhiahtlak’ tia an fak laiin Washington nena inremna hi India-a eptute chuan an sawisel ve mek bawk.
Inremna siam hnua thil langsar tak chu US-in Indian bungrua a lak luha chhiah 50% a lak thin chu 18%-ah a tihniam a ni.
Inremna siam leh Trump-a’n a puan angin chuan he inremnaah hian kum nga chhunga US energy product, thlawhna leh thlawhna parts, thir lam chi, lungalhthei leh technology thil siam chhuaha India atanga $ tluklehdingawn 500 a invest tur a tel.
White House-in thu a chhuaha a lan dan chuan inremna siamna bulpui ber chu India-in Russian tuialhthei lei a tihtawp vang a ni tih tar lan a ni bawk.
Hetih lai hian Iran-a indona avang hian India hi US chuan Russian tuialhthei lei ‘a phalsak’ leh a, Washington-in a sawi dan chuan hei hi Moscow tan sum lama hlawkna engmah awm lo tur a ni.
Inremna siam turin India-in Washington pan dawn – US palai
