Inremna tura kan rawtna US-in a chhang – Iran

Iran-in remna siam tura a rawtna hnuhnung ber chungchangah US chhanna a dawng niin an ram sorkar nena inzawm chanchinbuten an tar lang.
Iranian foreign ministry thupuangtu chuan chhanna hi Pakistan kaltlanga pek a nih thu leh an thlir leh mek thu a sawi niin Tasnim news agency-in a tar lang a ni.
US erawh chuan Tehran a chhang tih hi a la sawi ve rih lo va. Inrinni khan President Donald Trump-a chuan ‘Iran-in min rawn thawn thar ruahmanna chu kan en fiah thuai dawn a; mahse, pawm theih a nih erawh a rinawm lo,” tiin a lo sawi tawh.
Iranian sorkar chanchinbute chuan Tehran-in point 14-a ruahmanna a siamah hian Washington-in Iran ramri hnaiha sipai a dah chhuahtir te, lawng sipaiten Iranian lawng chawlhhmun an dan tihtawp te, Israel-in Lebanon-a beihpui a thlakna tela indona titawp vek a ngen niin an tar lang.
Ni 30 chhunga ram pahnihte inremna siam a phut bawk.
Iranian sorkar chanchinbute chuan he rawtna hian indo ram pahnihte hi tuna inkahhai kalpui mek a tawp huna pawh sei aiin ‘indona tihtawp’ lam ngaihtuah zawk turin a ngen tih an tar lang bawk.
Iran ruahmanna chungchang hi sawiin Trump-a chuan Inrinni tlai khan Truth Social-ah, “Kum 47 kalta chhunga mihringte leh khawvel chunga an thil tihte hi a man tha tawk an la pe lo,” tiin a ziak.
Hemi ni veka Palm Beach, Florida-ah thuthar thehdarhtute a kawmnaah ruahmanna hi chipchiar taka a la en loh thu a sawi bawk.
BBC-in Iran beih thar leh a ni dawn em tih zawh pawh Trump-a hian ‘thil theih’ a nih thu a sawi a. “An nungchang dik lo a nih chuan, thil tha lo an tih chuan,” a ti.
Iranian sorkar nena inzawm agency-te chuan Tehran-in rawtna a siam hnuhnung ber hi US rawtna point 9 a siam, thla hnih chhung inkahhai tuma rawtna chhan letna a nih thu an sawi.
Zirtawpni khan Trump-a hian US Congress member-te hnenah lehkha a thawnah April 8-a inkahhai puan atang khan buaina hi tihtawp a ni tawh tih a sawi a. Iran hian US leh he biala a sipai dahte tan hlauhawm a la siam chung pawhin buaina hi tihtawp a ni tih a ziak.
Iranian lawng chawlhhmunte khar chhunzawmin buaina a la awm tih a entir lo niin a sawi bawk a. “Inthian tha taka indansak a ni a, tute mahin an dodal lo,” tiin a sawi.
Tar lan tawh thin angin February 28 atang khan US leh Irael tang dun chuan Iran an bei tan a, April 18 atangin Pakistan hmalaknain US leh Iran hian inkahhai an puang a, tunah hian pawh seiin indona thawm a reh a; mahse, inremna a la awm loh avangin Middle East boruak a tang hle.
US-in Iranian lawng chawlh hmunte dansakin Tehran-in khawvela lawng kawng pawimawh ber pakhat, Strait of Hormuz a la dang chhunzawm a, khawvel eibar a nghawng mek.
Pakistan-in inremna a awm theih nan hma a la chhunzawm reng a, a anmahni kaltlangin indo tihtawp a nih theih nana rawtna an neihte pawh an inpe tawn a, Islamabad hian ram pahnih aiawhte inbiakna pawh a thleng tawh bawk.