Daily Newspaper

Inrinni bika Tokyo Olympics gold awrhtute

15

Judoka Naohisa Takato chu Japanese zinga Tokyo 2020 gold awrh hmasaber niin, men’s 60 kg judo final-ah Yang Yung-wei of Taiwan a hneh a, he huangah hian Yeldos Smetov of Kazakhstan leh Luka Mkheidze of France-te’n bronze medal an la ve bawk.

Triple world champion Takato hnehna hi he ram atanga zi-chhuak judo game tan a inhmeh zaiha ngaih a ni a, mecca of Japanese martial arts an tih mai leh concert atana an hman rim Nippon Budokan arena ruak huai hnuaiah Takato hian mittui tla chungin chak a lawm.

Japanese hmeichhe judoka Funa Tonaki pawhin 48kg class-ah final lut ve bawk mah se Kosovo nula Distria Krasniqi a hneh zo lo.

Chinese Zhihui Hou chuan women’s 49-kg weightlifting-ah gold medal dawngin, Tokyo Olympics-a China gold pahnihna a hmin a; he huangah hian Indian leh Indonesian nula a hmakhalh.

Weightlifting inelna bika India infiammi chhuak awmchhun Mirabai Chanu chuan silver awrhin, Rio 2016-ah khan Chanu hi inlan tawhin, total ziahluh loh pahnih zinga pakhat a ni.

Kum 19 mi Indonesian lifter Windy Cantika Aisah chuan bronze medal a awrh.

China tana gold medal hmasaber chu women’s 10-metre rifle final-ah Yang Qian chuan a hlawhchhuak a, Russian Anastasiia Galashina nen an inbeihnaah dingchang zawk a ni.

Serbian Damir Mikec chu pahnihna niin, 2008 Beijing Olympics champion Pang Wei of China chuan bronze a awrh a, defending Olympic champion Hoang Xuan Vinh of Vietnam chuan final a thleng zo lo.

Kosovo judoka Distria Krasniqi chuan final-a Japanese Funa Tonaki hnehin women’s 48kg category-ah gold medal a sualchhuak a; bronze medal chu Daria Bilodid of Ukraine leh Urantsetseg Munkhbat of Mongolia kutah a lut thung.

Olympic-a ropui thang China tan Inrinni vek khan Sun Yiwen chuan women’s individual epee fencing gold medal awrhin, overtime-ah five-time Olympian Ana Maria Popescu of Romania chu 11-10-in a hneh.

He huangah hian Ana Maria Popescu of Romania chu silver latu niin, Katrina Lehis of Estonia chuan bronze a dawng.

Hungary aiawh fencer Aron Szilagyi chuan Olympic history siamin, men’s individual sabre event-ah gold a awrh a, a title kawl lai humhimin, mipa fencer zingah fencing bik inelna pakhata gold medal pathum awrh thei hmasaber a ni.

Archery mixed team inelnaah South Korea chuan gold lain, he mixed archery gold hi number one seeds An San leh Kim Je Deok-te sualchhuah a ni a, Olympic archery-a South Korea ropuina an nemnghet.

Archery hi South Korea rama infiamna lar tak ni lo mah se he ramin Olympic-a record a neih hi tu tluk rual loh a ni a, kum 1984 atang khan Games tinah he ram hian archery gold medal an la kapchhuak ziah a, Olympic history sei ber a ni mek.

Richard Carapaz chuan Olympic road race-ah gold awrhin, Olympic-a Ecuador cycling medal hmasaber a ni.

Kum 28 mi ‘mountain man’ Carapaz hi climbing specialist tia hriathlawh niin, a behchhan Ineos Grenadiers team hrulah Carapaz hian Fuji International Speedway-ah Formula One car ang maia chakin cycle a khalh a, Ecuador tana Olympic gold medal latu awmchhun Atlanta 1996 race walking event-a chak Jefferson Pereza hnungdawltu a ni.

Kumnga kalta Rio Games bronze medallist Thailand mi Panipak Wongpattanakit chuan Spanish tleirawl Adriana Cerezo Iglesias hnehin women’s taekwondo 49kg category-ah gold medal a hlawhchhuak ve ta nge nge.

Serbia aiawh Tijana Bogdanovic leh Israel player Abishag Semberg-te’n bronze medal an dawng.

Italy player Vito Dell’Aquila chuan Tunisia mi Mohamed Khalil Jendoubi hnehin men’s taekwondo -58kg category gold medal a awrh a; South Korean Jang Jun leh Russian Mikhail Artamonov-te’n bronze medal an dawng thung.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy