Pathianni zan French Ligue 1 inkhel pakhatah mualneitu Paris Saint Germain chuan an mikhual Stade de Reims laka chak mai tawh tura ngaih an nih laiin hun pek belh tawp dawnah an hmahruaina an hloh a, 1-1 draw-a hun hmang zoin, kumin chhunga league game li an khelh tawhah tum thum tehreng point an hloh tling ta!
Champions League last-16 first leg lama Bayern Munich hmachhawn hnai tur an nih bawk avangin Europe club inelna sang bera champion mamawh ngawih ngawih team hian an thlen san hleih theihlohna Europe kawtkai thlengin inrintawkna an hloh palh ang tih chu PSG fans hlauh-thawn lian a nih ngei hmel!
Minute 59-ah an midfielder Marco Verratti hnawhchhuah ni bawk mah se minute 51-a Brazilian Neymar-a goal kha mualneitu team-in an chakpui thei ngei dawna a lan hnu hun pekbelh minute nga leh second 30-naah Folarin Bolagun chuan Reims siphurh a sut a, team pahnih hi goal khat ve ve thuna inhnehtawkin, Ligue 1 table-ah hma la hruai chhunzawm tho bawk mah se khelh 20 ve veah anmahni hnaihbertu Lens nen point thum chiahin an inthlau tawh.
Data lakhawmtu Opta an tihin kum 2006-07 season atanga a chhin-chhuah hnuah Pathianni zana Paris Saint Germain chakna daltu goal kha Ligue 1 bika PSG-in goal an chhuah tlai ber tum a la ni.
Balogun-a goal hmanga an point khat hlawhchhuah leh nen Reims khan inelna hrang hranga an game khelh hnuhnung vawi 14-ah tlawm an pumpelh fai vek a; PSG an draw-na goal khungtu England under-21 international khan tun season-ah Ligue 1 goal 11 a thun tling ta a, kum 21 ni chunga goal khung hnem ber leh Europe league lian zual pangate zinga chuti zat kum ni chunga goal thun hnem ber a ni mek bawk.
Reims coach Will Still kha kum 30 mi lek niin, Belgium rama piang, Englishman a ni a, nikum World Cup zawh hnua PSG starting XI-a an hmatawng hraw pathum Lionel Messi, Kylian Mbappe leh Neymar an tlanho leh vawikhatnaah a team-in tlawm an pumpelh.
An game hnuhnung pathuma vawihnih tlawm tling Paris club hian point 48 neiin, pahnihna RC Lens (45) leh Olympique de Marseille (43)-te’n an dawt a, khelh 20 an zawh tawhah pawh title race a la inhawngzau.
Reims khan point 26 neiin table-ah 11-na an luah thung.