Daily Newspaper

Insit chunga chhuah, Book of the Year ni ta

44

2019 chhunga chhuak Mizo lehkhabu tha ber atana thlan “Falung” tih hi lei tur i hmu rih kher lo ang; a ziatu hian bu tlem te chauh a siam a, chu pawh dawr pakhatah chauh a dah. A insit vang a ni.

“A soft copy ka chhiartir a, thian thate. Ka rin aiin an lo tuipui a, kan publish ta a. Insit chung chunga publish kan ni,” a ziaktu Lalengzauva chuan a ti.

He lehkhabu hi 2016 July-ah a tan a, a kum leh January-ah a zo. Mahse a chhuah nghal lo a, chhuah pawh a tum run lem lo. A dah ta vang vang a, 2019-ah a chhuah ta a ni. A chhuah han tih pawh hian, a hmingin a ti ve a ni ber ang; bu 500 chiah an chhu a, dawr pakhatah chauh an dah. An nupa inneih kum 25-na a ni a, chumi lawm nan chuan tiin a chhuah ta a, thian thate’n chhuah turin an lo ti bawk nen! A ziah zawh vek hnu-ah pawh a piang lo lek lek a nih chu.

A hmain “Zawlaidi” tih bu a lo chhuah tawh a, a thehdarh lam a hautakzia a lo hre tawh. “Sumdawnga tan kha ka peih ta lo deuh a ni,” a ti a, a insit bawk nen, “Falung” hi piang lo teuh tak a ni.

A ziah laiin a hahpui tih a sawi a, “Tlaivarpui chang te pawh ka nei. Rilrua a luh lai chuan mutsan a uiawm thin a, rilrua a luh laiin ka bei tlauh tlauh mai a,” a ti.

“Falung” hi novel a ni a, a ziaktu tan chuan thil thar han tih chhinna a ni. Mizo novel tam zawk hi a ruangam a inang deuh put tiin, plot danglam deuh han tih chhin a chak vanga he novel hi ziak a ni. Amah hi Mizo literature zirtirtu a ni a, entirnana hman tur plot chi dang deuh ziah tul a ti a, plot pahnih awmna “Falung” hi a ziak ta a ni. Mahse, sawi tawh angin, han publish hluah atan pawh a ti chuang lo a, a thiante’n publish tura an tih avangin, an nupa inneih kum 25 tlin lawm nan a publish ta a ni. Mahse Mizo Academy of Letters (MAL) lamin Bok of the Year atan an thlang ta a nih hi.

MAL hian kum dang aiin an thlang har a, kum dangah chuan kum khat chhunga lehkhabu tha ber hi a kum leh kum tir lamah thlangin, April ni 23-ah lawmman an pe thin. Kumin erawh, hrileng vangin a thlan hna an thawk hlei thei lo a, 2019-a chhuak lehkhabu tha ber pawh a kum leh kum tawp lamah an thlang fel thei chauh.

“Book of the Year hi ka rilru-ah a lang pha lo a, ka beisei phak bak a ni. Hetiang a nih ka ring lo,” Engzauva chuan a ti a, “A chi dang deuh han ziah chhin ka chak a, ka novel hmasa (‘Zawlaidi’) pawh kha a plot chu novel dang ang tho a ni a, tihian compound plot ka hmang chhin a,” a ti bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy