Zokhawthar bula |iau lui lei, Myanmar lam nena inkalpawhna kawng pawimawh khar a ni a, thla khat chuang an khar tawh. Hei hian Zokhawthar a nghawng a, Myanmar lam pawh a nghawng.
Champhai district-a Zokhawthar khua hi |iau lui kam khua a ni a, |iau lui lehlam chu Khawmawi niin, hei hi Myanmar lam khaw hmasa ber a ni. Khaw pahnih inkalpawhna lei hi Mizoram leh Myanmar insumdawn tawnna kawng pawimawh a ni a, Mizoramin khawchhak lam bungrua a lakna ber a ni. Mahse July ni 25 atang khan lei hi an khar a, Zokhawthar lam pawh, Khawmawi lam pawh a nghawng hle tih thu dawn a ni.
Lei khar chhan hi Zokhawthar lam chuan an hre lo a, July ni 23 khan customs hotute hnen atangin July ni 25-ah lei hi khar a nih tur thu an VC te’n an dawng. A chhan an hre lo a, vawiin thlengin khar a la ni.
Zokhawthar VC president Lalmuanpuia chuan mihring inkalpawh chu khap a nih loh thu leh bungrua erawh kaltlangpui phal a nih loh thu a sawi.
Mihring inkalpawhna lamah chuan harsatna a awm lo a, Myanmar lam atanga Zokhawthar-a sikul kalte pawhin harsatna an tawk lo tih a sawi.
Khawchhak lam bungrua, Mizorama lakluh hi Khawmawiah a thleng phawt a, chuta tang chuan Zokhawthar-ah thiar luh a ni thin. Chumi thiar hna leh a buaipui vel chu Khawmawi leh Zokhawthar mipuite eizawnna ber a ni a, chuvang chuan lei khar hian a nghawng hle.
Zokhawthar VC president Lalmuanpuia chuan an khaw chhungkaw tin a nghawng tih a sawi a, bungruaw thiar hi chhungkaw tin eizawnna a ni tia sawi theih a nih thu leh, an hna a tawp mek thu te a sawi.
An khuaah sum lengvak a tlem thu a sawi a, an eizawnna ber a tawp rih avang hian dawrkaite pawh a nghawng tih a sawi bawk.
Bungrua thiar hnathawkte hian ni khatah Rs 500 te, Rs 600 te an hlawh thei a, ni tina thawh tur a awm thu te, Rs 200-300 hlawh chang pawh a awm thu te a sawi.
An hna ber a tawp rih avangin inhlawh an zawng a, thawh tur dang an zawng tih a sawi a, Khawmawi lam pawh chutiang tho chu an nih thu a sawi bawk.
Insumdawn tawnna kawng kharin mipui nghawng
