Integrated Farming System (IFS)

Assam atanga kan indan hnuah kum 50 zet a vei ta a, ei leh barah intodelh thei lovin kan la awm reng a. Sawrkar hrang hrangin Mizoram hi an inenkawl chhawk a, an hun laiin sawrkar tinte khan hna chu an thawk theuh, mahse vision thui tak neia Mizoram hi an enkawl thin loh avangin tun hi kan thleng a ni a. Sawrkar thar apiangin ‘hma kan la dawn’ emaw ‘kan ruahman mek’ tih hi kalphung nghet taka an neih pakhat chu a la ni reng a. Sawrkar laipui atanga scheme tha pui pui lo kal thin pawh, sum sanction a awm laia thawk ve mai, scheme a tawp tak hnua chhunzawm tlaka chher chhuah nei mang lo kan ni ti ila, a sual em lovang chu; kan nei lo tawp chu a ni bik hran lo.
Tunah pawh FOCUS Fund hnuaiah Integrated Farming System (IFS) kan ti leh a, district pali-a khaw thlan bikah kalpui mek a ni a, terrace hmanga hmalakna a ni. Tlangram lo neih dan thar a ni dawn a. Terrace chherchhuan thum anga kalpuiin a chuan hnuai ber tin khat hmun aia zim loah thlai thlan bik fur-zikhlum, tomato leh thlai dangte chin a ni ang a, a chherchhuan laitaah sum chang thlai Dragon fruit emaw Limbu leh thlai dang remchang chingin, a chherchhuan thumna, a lu ber chu sum chang thei kung – theihai, lamkhuang, butterfruit, zawngtah leh thlai remchang dang phuna ram tihngaw tur a ni. Thlai enkawl nan hian chemical fertilizer ni lovin Bio-fertilizer hman a nih dawn avangin organic thlai hrisel tak tak a ni nghal bawk dawn a; a tha dawn hle a ni.
Kan hriat angin Mizoram hi tlangram a nih avangin hmun zawla tuilakna (irrigation) lian tak tak ang kha kalpui a remchang ve lo va, kan leilet neih thenkhatte pawh tuilakna a mumal loh avanga siam tak loh a awm thluah a ni. Ruahtui tha tak kum tin kan dawng a, chu pawh kum tin kan luan raltir mai mai zel bawk.
IFS kalpui tum a nih takah hian, ruahtui khawlkhawm (rainwater harvesting) lam a pawimawh hmel hle a. Ruahtui khawl chungchang pawh hi sawrkar chuan a sawirikna a rei tawh a, mihring in atan bakah thlai chawmna khawp hi kum tin ruahtui kan dawng a, tuna IFS buaipui tur nen hian a inhne rem nghal thup mai. IFS hi Mizoram tan chuan championpui ngei tura beihpui thlakna tur chi a nih hmel ta a ni.