Thawhtan zan khan Italian Serie A khelh chhunzawm a ni a, inkhel hmuhnawm takah champion lai Inter Milan chuan an mikhual Udinese an lehthal. Si hnih phur hmasa chunga Inter an chak let rual hian team hmasawn Como pawhin an mualah hnehna an chang ve bawk.
Champion lai Inter Milan hian an mualah bul an tan tha lo viau a, minute 16 chhung lekin goal hnih an chhuah hman. Hma takah si hnih phur bawk mahse champion ni awm renga mawiin an inlan a, goal nga ngawtin an khingpuite an chhanglet. 5-3 a khingpuite lehthalin Inter hian point thum hlu tak an hmu.
San Siro-ah Inter Milan hmachhawn tura lenglut Udinese tan hian James Abankwah chuan inkhel tan atanga minute 9-na lekah hmahruaina goal a thun nghal. Hma takah goal an thun vangin an phur viau a, na taka an khingpuite nawr chhunzawmin goal pawh an thun belh leh thuai. Mikhual team tan hian Jurgen Ekkelenkamp chuan minute 16-na lekah an goal hnihna a thun zui leh ta mai a, champion lai Inter Milan lakah chak theih beiseina sang tak an nei hman.
An mualah ngei goal hnih an chhuah hmasak hnuin Inter Milan an insiamtha thuai a, goal thun ngei tuma an khingpuite nawrin an hlawhtling har lo. Carlos Augusto chuan minute 26-naah goal thunin an si phurh a sut then. Augusto goal thun hian Inter Milan a fuih phur viau a, goal thun belh tumin thapui an thawh chhunzawm zat. Chawlhlawk dawn hnaih minute 35-naah Nicolò Barella chuan goal thunin an siphurh a sut zo va, 2-2 a inhnehtawk chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, goal li bawk a luh belh. Mualneitu Inter Milan tan Marcus Thuram chuan minute 57-naah hma an hruai letna goal a thun. An mikhual laka hma an hruai let tak vangin Inter hi phurna sang zawk nen an inlan chhunzawm a, goal pawh an thun belh leh thuai. Thuram goal thun atanga minute 10-na chiahah Pio Esposito chuan an goal lina thunin, an hmahruaina tizau leh zual.
4-2 ngawta hma an hruai let vangin Inter Milan an chak dawn tih a chiang tawk viau tawh. Hma hruai fal tawh mah se an la duhtawk mai lova, goal thun belh tumin an mikhualte an nawr chhunzawm. Inter tan hian Ange-Yoan Bonny chuan minute 79-naah an goal ngana a thun a, an hmahruaina a tizau leh zual. Si thum ngawta an hnufual hnuin Udinese tan Idrissa Gueye chuan minute 90-naah an goal thumna a thun a, an inkar a tizim thar leh. Goal dang thun belh tumin tan khawh viau mah se Udinese hian goal dang an thun belh thei tawh lova, Inter Milan lakah point hmuh theih an beiseina chu tiauchhum ang maiin a zamral zui ta a ni.
Champion lai Inter Milan hi Serie A season tharah vawi li khel tawhin an la chak vek a, an mahni ang thova chak vek AS Roma aia goal difference-a an chhiat zawk vangin pahnihnaa ah awm. Udinese hian khelh 4 atanga point 4 hmuin 13-na an luah ve thung.
Thawhtan zana inkhel dangah hmasawn chak tak Como in hnehna an chang a, an chetha chhunzawm zel. Cesc Fàbregas enkawlna hnuaia hmasawn a, champions league khel phak ta hial Como hian an mikhual Parma chu 2-1 in an hneh. Como tan hian Jacobo Ramón leh Kaiki ten goal khat ve ve an thun a. Parma goal neih chhun hi hun tawp dawn hnaih minute 90+2 a José Romero thun a ni. Como hian khelh 4 atanga point 10 hmuin palina an luah.
Inter leh Como te an chak
